‘પિતાને ભરણપોષણના પૈસા આપો નહીં તો જેલમાં જવા તૈયાર રહો’, હાઈકોર્ટે ત્રણ ભાઈઓને ચીમકી આપી

અમદાવાદ- ગુજરાત હાઈકોર્ટ દ્વારા ત્રણ ભાઈઓને ચેતવણી આપવામાં આવી છે કે જો તેઓ તેમના પિતાની કાળજી નહીં રાખે અને ગુજરાન માટે પૈસા નહીં આપે તો જેલની સજા કાપવી પડશે. ઉલ્લેખનીય છે કે કોર્ટે આ ભાઈઓને આદેશ આપ્યો હતો કે દર મહિને પિતાને 10,000 રુપિયા ચૂકવવાના રહેશે. આ આદેશના સંદર્ભમાં કોર્ટે જણાવ્યું કે, કોર્ટનો આદેશ જ્યારે આપવામાં આવ્યો હતો ત્યારથી લઈને અત્યાર સુધી જેટલી પણ રકમ ચૂકવવાની બાકી હોય તેના 50 ટકા વહેલી તક પિતાને આપવામાં આવે.કેસની વિગતવાર વાત કરવામાં આવે તો, 6 ડિસેમ્બર, 2021ના રોજ અમદાવાદના જિલ્લા કલેક્ટર દ્વારા આદેશ આપવામાં આવ્યો હતો કે ત્રણ ભાઈઓએ મળીને તેમના પતિ મનુ ગોદાણીને દર મહિને 10,000 રુપિયા ભરણપોષણ તરીકે આપવાના રહેશે. ત્રણ ભાઈઓમાંથી એક મુકેશ ગોદાણીએ આ આદેશને પડકારતી અરજી દાખલ કરી હતી.

આ પહેલા પિતાએ પોતાના દીકરા વિરુદ્ધ ફરિયાદ દાખલ કરી હતી. પિતાની માંગ હતી કે નિકોલ વિસ્તારમાં આવેલા તેમના ફ્લેટમાંથી દીકરાને બહાર કરવાનો આદેશ આપવામાં આવે. વૃદ્ધ પિતાનો દાવો છે કે, વર્ષ 2012માં તેમણે પાદરા ખાતે આવેલી પોતાની જમીન વેચીને આ ફ્લેટ ખરીદ્યો હતો. જો કે દીકરાએ જેમતેમ કરીને તે ફ્લેટ પોતાના નામે કરાવી લીધો હતો. જ્યારે તેમના પત્નીનું અવસાન થયું તો દીકરાએ તેમને ઘરમાંથી બહાર કાઢી મૂક્યા હતા.
Maintenance and Welfare of Parents and Senior Citizens Act અંતર્ગત તેમણે કાર્યવાહીની માંગ કરી હતી. સબ-ડિવિઝનલ મેજિસ્ટ્રેટે દીકરા મુકેશને આદેશ આપ્યો હતો કે તે પિતાને પૈસા ચૂકવે. મુકેશે જિલ્લા કલેક્ટર સમક્ષ અપીલ કરી હતી. કલેક્ટરે પણ આદેશ આપ્યો હતો કે ત્રણ ભાઈઓએ મળીને પિતાને દર મહિને પૈસા આપવાના રહેશે.

પિતા મનુ ગોદાણીના વકીલે કોર્ટમાં દલીલ કરી કે આ આદેશ 2019માં આપવામાં આવ્યો હતો, પરંતુ અત્યાર સુધી એક પણ દીકરાએ પૈસા ચૂકવ્યા નથી. આ સિવાય તેમણે ફ્લેટનું પઝેશન મેળવવાની માંગ પણ કરી હતી.આ પહેલા હાઈકોર્ટે સમાધાનનો પણ પ્રયત્ન કર્યો હતો પરંતુ પિતા અને દીકરા વચ્ચે કોઈ સમાધાન થઈ શક્યું નહોતું. જસ્ટિસ વૈષ્ણવે જણાવ્યું કે, દીકરાઓએ પિતાને પૈસા ચૂકવવા પડશે નહીં તો જેલમાં જવાની તૈયારી રાખો.
હાઈકોર્ટે આદેશ આપ્યો કે, 31મી જાન્યુઆરી સુધી અત્યાર સુધી જેટલી પણ રકમ ચૂકવવાની બાકી હોય તેના 50 ટકા આપી દેવામાં આવે.