કોર્ટનો અનાદર કરવાના કેસમાં સિનિયર એડવોકેટ યતીન ઓઝાને બે હજારનો દંડ

અમદાવાદઃ ગુજરાત હાઇકોર્ટ એડવોકેટ એસોસિએશનના પ્રમુખ યતીન ઓઝાને કન્ટેમ્પ્ટ ઓફ કોર્ટના આરોપમાં હાઇકોર્ટે દોષિત ઠેરવ્યા છે. જસ્ટિસ સોનિયા ગોકાણી અને જસ્ટિસ એન.વી. અંજારિયાએ તેમને કોર્ટના તિરસ્કાર બદલ મંગળવારે જ સુનાવણી દરમિયાન દોષિત જાહેર કર્યા હતા જોકે તેમની સજાને બુધવાર પર મુલતવી રાખવામાં આવી હતી. તેવામાં આજે બુધવારે હાઈકોર્ટે તેમને રુ. 2000નો દંડ અને એક આખો દિવસ કોર્ટમાં બેસી રહેવાની સજા ફટકારી છે.

મહત્વનું છે કે હાઇકોર્ટની રજિસ્ટ્રી પર ગંભીર આક્ષેપો કરવા બદલ તેમની સામે આ કેસ ચલાવવામાં આવ્યા હતો. મહત્વનું છે કે આ સમગ્ર પ્રકરણમાં યતિન ઓઝાએ 6 જૂનના રોજ ફેસબુક લાઈવ કરીને એક પ્રેસ કોન્ફરન્સ યોજી હતી જેમાં હાઇકોર્ટને ‘જુગારધામ’ કહ્યું હતું અને હાઇકોર્ટની રજીસ્ટ્રી વિરૂદ્ધ આક્ષેપો કર્યા હતા.

ત્યારબાદ તેમની સામે હાઇકોર્ટે સુઓમોટો ક્રિમીનલ કન્ટેમ્પ્ટ દાખલ કરી હતી .તેમજ કેસની સુનાવણી હાથ ધરાઇ હતી. દરમિયાન હાઇકોર્ટની ફુલ કોર્ટ દ્વારા યતીન ઓઝાનું સિનીયર તરીકેનું ડેઝિગ્નેશન પણ પરત ખેંચી લેવાનો નિર્ણય કર્યો હતો.

જોકે દરમિયાન યતીન ઓઝાએ હાઇકોર્ટ અને સુપ્રીમ કોર્ટ બંને સમક્ષ બિનશરતી માફી પણ માગી હતી. કોર્ટે તેમની માફી રદ કરી હતી. આ કેસમાં ગત દિવસોમાં સતત સુનાવણી બાદ આજે જસ્ટિસ સોનિયા ગોકાણી અને જસ્ટિસ એન.વી. અંજારિયાની ખંડપીઠે તેમને સજા સંભળાવી છે.