કોરોનાના ડેઈલી કેસોમાં સતત ઘટાડો, રાજ્યમાં આજે 2,521 નવા દર્દી નોંધાયા

ગાંધીનગર: ગુજરાતમાં કોરોનાના રોજેરોજ નોંધાતા નવા કેસોમાં સતત ઘટાડો જોવાઈ રહ્યો છે. આજે સરકાર દ્વારા જાહેર કરવામાં આવેલા આંકડા અનુસાર, રાજ્યમાં છેલ્લા 24 કલાકમાં 2,521 નવા કેસ નોંધાયા છે. આ સાથે જ અત્યારસુધી નોંધાયેલા કુલ કેસોનો આંકડો 8.03 લાખ પર પહોંચ્યો છે. આજના દિવસમાં થયેલા મૃત્યુની વાત કરવામાં આવે તો છેલ્લે 24 કલાકમાં 27 દર્દીઓએ દમ તોડ્યો છે, અને રાજ્યમાં અત્યારસુધી થયેલા કુલ મૃત્યુનો આંક 9,761 પર પહોંચ્યો છે.

છેલ્લા 24 કલાકમાં સૌથી વધુ 336 નવા કેસ અમદાવાદ શહેરમાં નોંધાયા છે. ત્યારબાદ 308 કેસ સાથે વડોદરા બીજા નંબર પર છે, જ્યારે સુરતમાં સ્થિતિ સુધરતી નજરે પડી રહી છે, અને અહીં આજે 228 કેસ નોંધાયા છે. વડોદરા જિલ્લામાં છેલ્લા 24 કલાકમાં 172 કેસ નોંધાયા છે, જે ગ્રામ્ય વિસ્તારમાં કોઈ એક જિલ્લામાં નોંધાયેલા સૌથી વધારે કેસ છે. વડોદરા ગ્રામ્ય બાદ રાજકોટ શહેર 122 કેસ સાથે પાંચમા નંબર પર છે.

સરકારી આંકડા અનુસાર, રાજ્યમાં રિકવરી રેટ વધીને 93.36 ટકા પર પહોંચ્યો છે. સમગ્ર રાજ્યમાં રસીકરણની પ્રક્રિયા પણ ઝડપી બનાવાઈ છે. આજે કુલ 2.36 લાખ લોકોને વેક્સિન આપવામાં આવી હતી.

અન્ય જિલ્લાની વાત કરીએ તો, સુરત ગ્રામ્યમાં 84, અમરેલીમાં 80, જુનાગઢમાં 75, રાજકોટમાં 68, ગીર સોમનાથમાં 67, પોરબંદરમાં 65, નવસારીમાં 60 નવા કેસ સામે આવ્યા છે. હાલ રાજ્યમાં કુલ 43,611 એક્ટિવ કેસ છે જેમાંથી 562 દર્દીઓ વેન્ટિલેટર પર છે અને બાકીના સ્ટેબલ છે. વિતેલા 24 કલાકમાં રાજ્યની વિવિધ હોસ્પિટલોમાંથી 7,965 દર્દીઓને રજા આપવામાં આવી છે.