ગુજરાતમાં કોરોના કેસો વધતા ઓક્સિજન પ્રોડક્શન યુનિટોને અપાઈ મહત્વની સૂચના

અમદાવાદ: રાજ્યમાં કોરોના વાયરસના કેસો વધવાની વચ્ચે રાજ્ય સરકારના આરોગ્ય વિભાગ દ્વારા રાજ્યના ઓક્સિજન પ્રોડક્શન યુનિટોને ફરી એકવખત સૂચના આપી છે કે, તે 50 ટકા પ્રોડક્શન તબીબી ઉપયોગ માટે રિઝર્વ રાખે, જેથી કોરોના વાયરસના દર્દીઓની સારવાર માટે ઓક્સિજન સરળતાથી મળી શકે. રાજ્યના આરોગ્ય વિભાગે ગત 10 સપ્ટેમ્બરે પણ આવું જ નોટિફિકેશન બહાર પાડ્યું હતું.

26મી નવેમ્બરના પોતાના નવા ઓર્ડરમાં મહામારી કાયદા અને ડિઝાસ્ટર મેનેજમેન્ટ એક્ટની વિવિધ કલમો અંતર્ગત આરોગ્ય વિભાગે સૂચના આપી છે કે, ઓક્સિજન પ્રોડક્શન યુનિટો તેમનું પ્રોડક્શન રોકાયા વિના ચાલુ રાખે અને વધુમાં વધુ પ્રોડક્શન કેપિસિટી સાથે કામ કરે.

યુનિટોને કહેવાયું છે કે, 50 ટકા ઓક્સિજન રાજ્યની વિવિધ હોસ્પિટલોમાં સપ્લાય કરવા તબીબી ઉપયોગ માટે પ્રોડ્યૂસ કરે અને બાકીના ઓક્સિજનને ઔદ્યોગિક હેતુ માટે આપે. યુનિટોને એમ પણ કહેવાયું છે કે, જો જરૂરિયાત વધે તો ઉદ્યોગો કરતા પહેલા હોસ્પિટલોને ઓક્સિજન પૂરો પાડવાને પ્રાયોરિટી આપવામાં આવે.

નોટિફિકેશનમાં કહેવાયું છે કે, આ આદેશ 31મી ડિસેમ્બર સુધી અમલમાં રહેશે. નવેમ્બરમાં પણ આવો જ આદેશ એક મહિના માટે આપવામાં આવ્યો હતો.. જોકે, બાદમાં કોરોના કેસો ઘટવાને પગલે આદેશને આગળ વધારવામાં આવ્યો ન હતો.

રાજ્યના ફૂડ એન્ડ ડ્રગ કન્ટ્રોલ એડમિનિસ્ટ્રેશન કમિશનર એ જી કોશિયાએ અગાઉ જણાવ્યું હતું કે, સપ્ટેમ્બરની સરખામણીએ ઓક્ટોબરમાં ઓક્સિજનની માગ ઘટી હતી. ઓક્ટોબરમાં ઓક્સિજનનો વપરાશ દરરોજ 135 ટન થયો હતો. જ્યારે સપ્ટેમ્બરમાં દરરોજ 240 ટન ઓક્સિજનની જરૂર પડી હતી. રાજ્યમાં કોરોના કેસો ઘટવાને પગલે ઓક્સિજનનો વપરાશ ઘટ્યો હતો.

જોકે, તાજેતરના સપ્તાહોમાં રાજ્યમાં કોરોનાના કેસોમાં ઉછાળો આવ્યો છે. જેના કારણે હોસ્પિટલોમાં ઓક્સિજનની માગ વધી છે.

રાજ્યમાં રવિવારે કોરોનાના 1,564 કેસ નોંધાયા હતા. તે સાથે કુલ કેસોનો આંકડો 2,08,278એ પહોંચી ગયો છે.