હવામાનમાં પલ્ટાની આગાહી, માર્ચના અંત પહેલા ગરમીનો પારો 40 પર પહોંચવાની શક્યતા

અમદાવાદઃ પાછલા કેટલાક સમયથી હવામાનમાં આવી રહેલા પલ્ટામાં વધુ એક પલ્ટો આવવાની આગાહી વ્યક્ત કરવામાં આવી છે. હવામાન શાસ્ત્રીનું માનવું છે કે ઉનાળા દરમિયાન વાતાવરણમાં વારંવાર પલ્ટો આવી શકે છે. આવામાં કચ્છમાં ધૂળીયું વાતાવરણ રહેશે અને દરિયાકિનારાના વિસ્તારોમાં વાદળછાયું વાતાવરણ રહેવાની સંભાવના વ્યક્ત કરવામાં આવી છે.

રાજ્યના હવામાનમાં આવનારા પલ્ટા અંગે કરવામાં આવેલી આગાહી પ્રાણે 12થી 15 માર્ચ દરમિયાન સૌરાષ્ટ્રના કેટલાક ભાગોમાં વાદળછાયું વાતાવરણ રહેવાની સાથે માવઠું થવાની સંભાવના છે. દેશના ઉત્તર ભાગમાં પર્વતીય વિસ્તારોમાં હિમવર્ષા થવાની શક્યતા છે. શિયાળા દરમિયાન વાતાવરણમાં આવેલા પલ્ટાના કારણે ખેડૂતોને હાલાકી ભોગવવી પડી હતી. હવે ઉનાળા દરમિયાન પણ વાતાવરણમાં આવનારા પલ્ટાના કારણે ખેડૂતોની ચિંતામાં વધારો થયો છે.

એક ધરફ ધીમ તાપ વધી રહ્યો છે તો બીજી તરફ રાતના સમયે અને પરોઢિયે હજુ પણ ઠંડકનો અનુભવ થઈ રહ્યો છે. આ ઠંડકના કારણે ડબલ ઋતુનો અનુભવ થઈ રહ્યો છે જેમાં શરદીના કેસોમાં વધારો થઈ રહ્યો છે. આ સાથે વાઈરલ ઈન્ફેક્શનના કેસોમાં પણ વધારો થઈ રહ્યો છે.

બીજી તરફ હવામાન વિભાગ દ્વારા એવી પણ આગાહી વ્યક્ત કરવામાં આવી છે કે આ વખતે ઉનાળો સામાન્ય કરતા આકરો રહેશે. માર્ચ મહિનાના પ્રથમ સપ્તાહમાં મહત્તમ તાપમાન 38 ડિગ્રી પહોંચ્યું છે. જ્યારે 13 માર્ચ બાદ ગરમીનો પારો 40 ડિગ્રી પર જવાની સંભાવના વ્યક્ત કરવામાં આવી રહી છે.

આગામી સમયમાં ગરમીનું પ્રમાણ વધવાનું શરુ થવાનું છે ત્યારે વાદળછાયું અને ધૂળિયું વાતાવરણ પણ રહેવાની સંભાવના છે. બીજી તરફ ખેડૂતોની પણ ચિંતા વધી રહી છે.