ગુજરાતથી રિસાયા મેઘરાજા? આગામી 5 દિવસમાં ભારે વરસાદની આગાહી નથી

અમદાવાદઃ જુલાઈની શરુઆત દક્ષિણ અને મધ્ય ગુજરાત સાથે સૌરાષ્ટ્રમાં મેઘરાજાએ સારી બેટિંગ કર્યા પછી હવે આગામી 5 દિવસ સુધી રાજ્યમાં ક્યાંય ભારે વરસાદની આગાહી નથી. હવામાન વિભાગની આગાહી પ્રમાણે દક્ષિણ ગુજરાત અને સૌરાષ્ટ્રના કેટલાક ભાગોમાં એકદમ સામાન્ય વરસાદ થઈ શકે છે. વરસાદ ખેંચાવાના કારણે ખેડૂતોની ચિંતામાં વધારો થયો છે. વરસાદ ઘટવાના કારણે ગરમીમાં પણ સતત વધારો થઈ રહ્યો છે. હવામાન વિભાગની સેટેલાઈટ ઈમેજમાં પણ ગુજરાત એકદમ સાફ દેખાઈ રહ્યું છે. વરસાદ ખેંચાવાના કારણે ગરમીનો પારો ચઢતો દેખાઈ રહ્યો છે. રાજ્યમાં મોટા ભાગના શહેરોમાં તાપમાન 35ને વટાવી દીધું છે, વાદળછાયું વાતાવરણ અમે ગરમીના કારણે બફારાની બૂમો વધી છે. આજના દિવસે અમદાવાદ, ભાવગનર, ગાંધીનગર, સુરેન્દ્રનગરમાં પારો 38 ડીગ્રીની ઉપર જઈ રહ્યો છે. જ્યારે સુરત, વડોદરા, ડીસા, નલિયા, ભૂજમાં પારો 35ને પાર પહોંચશે. જો આગામી સમયમાં વરસાદના થયો તો ગરમીનો પારો ફરી 40ને પાર જવાની સંભાવના દેખાઈ રહી છે. આગામી પાંચ દિવસની વાત કરીએ તો દક્ષિણ ગુજરાતના સુરત, વલસાડ, નવસારી, તાપી, નર્મદા, દમણ અને સૌરાષ્ટ્રના ગીર સોમનાથ, ભાવનગર, અમરેલી અને દીવમાં સામાન્ય વરસાદ થવાની સંભાવના વ્યક્ત કરવામાં આવી છે. જોકે, આ શક્યતા બહુ જ ઓછી છે. મહત્વનું છે કે દર વર્ષના આંકડાની સરખામણીમાં આ વખતે વરસાદ ઓછો થયો છે. વરસાદ ઓછો થવાના કારણે જળાશયો પણ ખાલી છે. સારો વરસાદ થાય તે માટે પૂજા અને હવન પણ કરવામાં આવી રહ્યા છે. આ ચોમાસામાં મધ્ય અને ઉત્તર ગુજરાતના કેટલાક ભાગોમાં લગભગ નહીવત જેવો વરસાદ થયો છે ત્યાં સારો વરસાદ થાય તેવી ઈચ્છા લોકો વ્યક્ત કરી રહ્યા છે. દેશના અન્ય ભાગોમાં પણ વરસાદ ઓછો થવાના કારણે ચિંતાના વાદળો ઘેરાયા છે.