ગુજરાતમાં બે વરસાદી સિસ્ટમ સક્રિય, આ જિલ્લાઓમાં ભારે વરસાદની આગાહી

અમદાવાદ: આગામી પાંચ દિવસ (11થી 15 ઓગસ્ટ) દરમિયાન રાજ્યમાં ભારેથી અતિભારે વરસાદની હવામાન વિભાગ દ્વારા આગાહી કરવામાં આવી છે. હવામાન વિભાગ મુજબ રાજ્યમાં સાયક્લોનિક સર્ક્યુલેશન સાથે વરસાદ લાવે તેવી બીજી સિસ્ટમ પણ સક્રિય થઈ છે. જેથી આગામી 5 દિવસ રાજ્યના અનેક ભાગોમાં ભારેથી અતિભારે વરસાદ પડે તેવી સંભાવના છે. સોમવારે પણ રાજ્યના કેટલાય જિલ્લાઓમાં હળવેથી મધ્યમ તો ક્યાંક ભારેથી અતિભારે વરસાદ પડ્યો હતો. તો કેટલીક જગ્યાએ છૂટો છવાયો વરસાદ પડ્યો હતો.
રિપોર્ટ મુજબ ગુજરાતમાં ચોમાસું જોરદાર રીતે સક્રિય થઈ ગયું છે. હવામાન વિભાગના જણાવ્યાનુસાર હવે રાજ્યમાં વરસાદી માહોલ જામી રહ્યો છે. દક્ષિણ પાકિસ્તાન પર સાયક્લોનિક સિસ્ટમની સાથે રાજ્યમાં વધુ એક વરસાદી સિસ્ટમ સક્રિય બની છે. આ બંને સિસ્ટમને કારણે રાજ્યમાં આગામી દિવસો દરમિયાન વરસાદી માહોલ રહેશે. હવામાન વિભાગે રાજ્યના વિવિધ જિલ્લાઓમાં ભારેથી અતિભારે વરસાદની આગાહી કરી છે.

આગામી પાંચ દિવસ આ જિલ્લાઓમાં વરસાદની આગાહી
11 ઓગસ્ટ: બનાસકાંઠા, પાટણ, મહેસાણા, સાબરકાંઠા, ગાંધીનગર, અરવલ્લી, ખેડા, અમદાવાદ, આણંદ, પંચમહાલ, દાહોદ, છોટાઉદેપુર, સુરત, ડાંગ, તાપી અને નવસારી.
12 ઓગસ્ટ: બનાસકાંઠા, પંચમહાલ, પાટણ, વડોદરા, છોટાઉદેપુર અને ભરૂચ.
13 ઓગસ્ટ: વલસાડ, દમણ, દાદરા નગર હવેલી, બનાસકાંઠા, પાટણ, ડાંગ, નવસારી, જૂનાગઢ અને કચ્છ.
14 ઓગસ્ટ: ડાંગ, વલસાડ, નવસારી, દમણ, દાદરા નગર હવેલી, બનાસકાંઠા, પાટણ, સાબરકાંઠા, ભરૂચ, સુરત, તાપી, જૂનાગઢ અને ગીર સોમનાથ.
15 ઓગસ્ટ: વલસાડ, દમણ, દાદરા નગર હવેલી, સુરત, ડાંગ, નવસારી, ગીર સોમનાથ, બનાસકાંઠા, પાટણ, ભરૂચ, તાપી, પોરબંદર, જૂનાગઢ, દ્વારકા અને કચ્છ.

અમદાવાદની વાત કરીએ તો અહીં સવારથી જ વાદળછાયું વાતાવરણ છે. જોકે આગામી 24 કલાક દરમિયાન ગાજવીજ સાથે વરસાદ પડે તેવી શક્યતા છે. જણાવી દઈએ કે સોમવારે અમદાવાદના વિવિધ ભાગોમાં વિસ્તાર પડ્યો હતો જેમાં અમુક વિસ્તારોમાં પાણી પણ ભરાયા હતા. તો બીજી તરફ અમદાવાદીઓ રિવરફ્રન્ટ પર વરસાદની મજા માણતા જોવા મળ્યા હતા. આમ દિવસભર વાદળછાયા વાતાવરણ બાદ સાંજે વરસાદ પડતા વાતાવરણમાં ઠંડક પ્રસરી હતી.