ન્યૂયર પર પાર્ટી માટે ગુજરાતીઓએ શોધ્યો નવો રસ્તો, આમ કાયદો તોડ્યા વિના કરશે એન્જોય

I am Gujarat

ન્યૂયર પર પાર્ટી કરવા ગુજરાતીઓએ શોધ્યો નવો રસ્તો

નિયતિ પરિખ, અમદાવાદઃ આગામી ન્યૂયર પર દારૂ પાર્ટી કરવાના શોખીનોએ આ વર્ષે નવો રસ્સો શોધી કાઢ્યો છે. લીકરના શોખીનોએ આ વર્ષે પોતાની બેગ પેક કરીને ક્રિસમસ અને 31stના સેલિબ્રેશન માટે ગુજરાતની બોર્ડર નજીકના સ્થળોએ પહોંચી ગયા છે, જેથી શાંતિથી પાર્ટી માણી શકે અને કાયદો તોડવાનો ભય પણ ન રહે. આ સ્થળોમાં દિવ, દમણ અને ઉદયપુર ખૂબ જ લોકપ્રિય સ્થળો બન્યા છે. આ સ્થળોએ ગુજરાતના ટુરિસ્ટની સંખ્યા હોટલોમાં ખાસી વધી ગઈ છે. તેની અસરે એરલાઈન્સ અને કેબના ભાડામાં પણ 30 ટકાનો ઉછાળો જોવા મળ્યો છે.

રાજ્ય બહારના સ્થળો હોટ ફેવરિટ

શહેરની પ્રોફેશનલ અનિશા સિંહે જણાવ્યું કે, નવા વર્ષની પૂર્વ સંધ્યાએ હું અને મારા પતિ કેટલાક મિત્રો સાથે ઉદયપુરની રોડ ટ્રિપ કરીશું. અમે ભારે ઉત્સાહ સાથે પાર્ટી કરવાના છીએ. કાયદો તોડવાના ડરના કારણે અમે રાજ્ય બહાર જઈને પાર્ટી કરવાનું નક્કી કર્યું છે. હાલમાં જ સુરતમાં એક હોટલમાં રેઈડ દરમિયાન હાઈ પ્રોફાઈલ મહિલાઓ દારૂની પાર્ટી કરતા પકડાઈ હતી. જે કારણે ઘણા લોકો ન્યૂયર પૂર્વે સાવધાન થઈ ચૂક્યા છે.

દીવમાં મોટાભાગની હોટલો બુક

દીવ હોટલ્સ એસોસિયેશનના વાઈસ પ્રેસિડેન્ડ, રામજી પારસમણીએ જણાવ્યું કે, દીવની મોટાભાગની હોટલે 5મી જાન્યુઆરી સુધી બુક છે અને ભાડું પણ 20થી 30 ટકા સુધી વધી ગયું છે. બુકિંગ ખૂબ જ સરસ ચાલી રહ્યું છે હાલમાં માત્ર અમુક રૂમો જ ઉપલબ્ધ છે. દીવના પ્રસાસને પણ 31st ડિસેમ્બરના દિવસે મોડી રાત સુધી હોટલો ચાલુ રાખવા માટે મંજૂરી આપી દીધી છે.

દમણમાં પણ ગુજરાતીઓનો ઘસારો

અન્ય મહત્વનું સ્થળ દમણ છે. દમણમાં પણ રૂમ ભાડામાં 25 ટકા સુધીનો વધારો જોવા મળી રહ્યો છે. દમણ હોટલ્સ અને રેસ્ટોરન્ટ એસોસિયેશનના પ્રમુખ હરીશ થંગલે કહ્યું કે, મોટાભાગની હોટલો એડવાન્સ્ડમાં બુક છે. આ વર્ષની ક્રિસમસ સિઝન પાછલા વર્ષની તુલનાએ ઘણી સારી છે. દમણના અન્ય હોટલ માલિક પ્રકાશ ટંડેલે જણાવ્યું, અમારી મોટાભાગના રૂમો સુરત અને મુંબઈના ગ્રાહકો દ્વારા બુક કરવામાં આવ્યા છે. અંદાજ મુજબ ક્રિસમસ અને નવા વર્ષના સેલિબ્રેશન માટે 1 લાખ ગુજરાતીઓ રાજ્ય બહાર નીકળ્યા છે.

કેબ અને એરફેરમાં ઉછાળો

શહેરના ટૂર ઓપરેટર મનિશ શર્માએ જણાવ્યું કે, યુવાનોમાં ગોવા હંમેશાથી લોકપ્રિય રહ્યું છે, ત્યારે આ વખતે ગુજરાતી ટુરિસ્ટમાં ઉદયપુર અને જોધપુર પણ ખાસ લોકપ્રિય રહ્યું. આ રૂટ્સ પર ડિમાન્ડ વધવાના કારણે એરભાડા અને કેબના ભાડામાં પણ વધારો થયો છે. તો દિવ અને દમણેમાં મલ્ટી-યુટિલિટી વ્હીકલની માગ પણ ખૂબ વધી ગઈ છે.