અ'વાદઃ 'પતિ હાજર નથી તો બ્લૂ ફિલ્મ જોઈલે મજા આવશે', સસરા પર વહુની છેડતીનો આરોપ

અમદાવાદઃ શહેરના સરદારનગર પોલીસ મથકમાં એક પુત્રવધુએ પોતાના સસરા, પતિ સહિત સાસરિયા સામે ફરિયાદ નોંધાવી છે. જે મુજબ, પતિની ગેરહાજરીમાં સસરા પુત્રવધુને બ્લુ ફિલ્મ જોવાનું કહીને તેની છેડતી કરતા હોવાનો આક્ષેપ કરવામાં આવ્યો છે. ઉપરાંત ધંધા માટે પણ દુકાન લેવા સાસરિયાએ 25 લાખ રૂપિયાના દહેજની માગણી કરી હતી. જ્યારે સસરા વારંવાર છેડતી કરતા હોવાનો ઉલ્લેખ પરિણીતાએ પોતાની ફરિયાદમાં કર્યો છે.

ઘટનાની વિગતો મુજબ, વાડજમાં રહેતી રોમાના લગ્ન તેના જ સમાજના ક્રિશ સાથે 2016માં થયા હતા. લગ્ન બાદ રોમા સરદારનગર ખાતે સાસુ-સસરા, દિયર સહિતના લોકો સાથે સંયુક્ત કુટુંબમાં રહેતી હતી. લગ્નના થોડા જ મહિનાઓમાં સાસરિયાઓએ રોમાને ત્રાસ આપવાનું શરૂ કરી દીધું. તેઓ રોમાને કહેતા, તું પિયરમાંથી કંઈ નથી લાવી. હવે ધંધા માટે દુકાન લેવી છે તો 25 લાખ રૂપિયા લઈ આવ. ત્યારે રોમાએ કહ્યું કે, લગ્ન વખતે પિતાએ યશાશક્તિ મુજબ કરિયાવર આપ્યું હતું હવે તેઓ કોઈ પૈસા આપશે નહીં. રોમાના આવા જવાબ બાદ સાસરિયા તેને ત્રાસ આપવા લાગ્યા. પતિ રોમાને કોઈ વસ્તુ માટે પૈસા પણ નહોતો આપતો અને વસ્તુ અપાવતો પણ નહોતો. આ દરમિયાન રોમાએ દીકરીને જન્મ આપ્યો જે બાદ ત્રાસ વધી ગયો.

રોમાનો પતિ ક્રિશ થોડા દિવસો બાદ બહાર ગયો ત્યારે સસરા અને દિયર દીકરી લેવાના બહાને રોમાને અડપલા કરતા હતા. સસરાએ તો હદ વટાવી નાખી. તેમણે વહુને કહ્યું, 'તારા પતિ હાજર નથી તારી શારિરીત જરૂરિયાતો કોણ પૂરી કરશે. તું બ્લૂ ફિલ્મ જોઈ લે. મજા આવશે.' આ ઉપરાંત સસરા અવારનવાર છેડતી કરતા હતા. રોમા એક દિવસે સૂતી હતી ત્યારે કોઈએ તેને અડપલાં કરતા તે જાગી ગઈ આ સમયે તેને સસરાને રૂમમાંથી બહાર જતા જોયા. જેથી રોમાએ પોતાના પતિને આ મામલે ફરિયાદ કરી પરંતુ પતિએ તેના પર કંઈ ધ્યાન ન આપ્યું.

સસરાની આવી વારંવારની છેડતીનો ભોગ બનેલી રોમા રૂમમાં એકલી રહેતી નહોતી. તેની માતાનો જન્મદિવસ હોવા છતાં પણ સાસરિયાએ તેને જવા દીધી નહોતી અને તેની સાથે તકરાર કરી હતી. માર્ચ મહિનામાં રોમા દીકરીને લઈને પિયર જતી રહી ત્યારે પતિ ત્યાં દીકરીને એક દિવસ માટે લઈ ગયો પરંતુ 10 દિવસ થવા છતાં પરત મૂકવા નહોતો આવ્યો. એવામાં સમાજના લોકોએ વચ્ચે સમાધાન કરાવતા રોમા પરત આવી હતી. જોકે તેમ છતાં સસરાએ પોતાની ગંદી હરકતો ચાલુ રાખી અને તેને હેરાન કરતા હતા. જેથી તેણે પતિ સહિતના સાસરિયા સામે ફરિયાદ નોંધાવતા પોલીસે તપાસ શરૂ કરી હતી. (ઓળખ છુપાવવા પાત્રોના નામ બદલ્યાં છે.)