હાર્દિક પટેલ ગુજરાત બહાર નહીં જઈ શકે, સેશન્સ કોર્ટે ફગાવી અરજી

અમદાવાદ: હાર્દિક પટેલની ગુજરાત બહાર જવાની અરજી અમદાવાદ સેશન્સ કોર્ટે ફગાવી દીધી છે. જેથી હાર્દિક પટેલ રાજ્યની બહાર નહીં જઈ શકે. કોંગ્રેસના કાર્યકરી પ્રમુખ હાર્દિક પટેલે વારંવાર રાજ્યની બહાર જવું પડતું હોવાને કારણે 12 અઠવાડિયા સુધી જામીનની શરતો સુધારવામાં આવે તેવી સેશન્સ કોર્ટમાં અરજી કરી હતી. સુનાવણી દરમિયાન કોર્ટે હાર્દિક પટેલની ગુજરાત બહાર જવાની અરજી ફગાવી દીધી છે. ઉલ્લેખનીય છે કે, રાજદ્રોહ કેસમાં જામીન આપતી વખતે કોર્ટે હાર્દિકને ગુજરાત બહાર ન જવાની શરતે જ જામીન આપ્યા હતા.

સરકારે કોર્ટમાં રજૂઆત કરી
અગાઉ હાર્દિક પટેલે 90 દિવસ માટે ગુજરાત બહાર જવા માટે અરજી કરી હતી. જેનો સરકારે વિરોધ કર્યો હતો. રાજ્ય સરકારે કોર્ટમાં કહ્યું હતું કે, હાર્દિક પટેલ સામે ગંભીર ગુનો હોવાથી રાજ્યની બહાર ન જવા દેવો યોગ્ય નથી. કોંગ્રેસના કાર્યકરી પ્રમુખ હોવાથી જવા દેવાય એ પણ યોગ્ય નથી, કાયદો તમામ માટે એક સરખો છે. રાજ્ય સરકારે અન્ય રાજ્યની શાંતિની ભંગ થતી હોવાની પણ કોર્ટ સમક્ષ રજૂઆત કરી હતી.

શું છે મામલો?
ઉલ્લેખનીય છે કે, વર્ષ 2016માં પાટીદાર અનામત આંદોલન દરમિયાન પાસના કન્વીનર હાર્દિક પટેલ, કેતન પટેલ, દિનેશ બાંભણિયા અને ચિરાગ પટેલ વિરુદ્ધ રાજદ્રોહનો ગુનો નોંધાયો હતો. જેમાં ક્રાઇમ બ્રાન્ચે આરોપીઓ સામે કોર્ટમાં ચાર્જશીટ દાખલ કરી હતી. આ કેસની કાનૂની કાર્યવાહી સેશન્સ કોર્ટમાં ચાલી રહી છે. જોકે, છેલ્લા ઘણા સમયથી હાર્દિક સહિતના આરોપીઓ જાણી જોઇને વિવિધ પ્રકારની અરજીઓ કરી મુદત પડાવી રહ્યા હોવાનું સામે આવ્યું છે.