'તડીપાર' હાર્દિક પટેલ રાજસ્થાન પહોંચ્યો, રતનપુર બોર્ડર પર કરાયું સ્વાગત

નવગુજરાત સમય.કોમ

નવ મહિના જેલમાં રહ્યા બાદ 6 મહિના ગુજરાત બહાર રહેવાની શરતે જામીન પર છૂટેલો હાર્દિક પટેલ ગુજરાત હાઈકોર્ટના આદેશ મુજબ સવારે 11 કલાક પહેલા સાબરકાંઠાના માર્ગે ગુજરાત બોર્ડર ક્રોસ કરી રાજસ્થાનમાં પ્રવેશ્યો હતો. રાજસ્થાનમાં પ્રવેશ કરતા જ રતનપુર બોર્ડર પર હાર્દિકનું સ્વાગત કરવામાં આવ્યું હતું. હાર્દિક પટેલ હવે 6 મહિના ઉદયપુરમાં રોકાશે.

આ પહેલા ગત 15મીને શુક્રવારે જેલમાંથી બહાર આવ્યા બાદ તેણે સુરતમાં રોડ-શો કર્યો હતો અને બાદમાં રાત્રે અમદાવાદમાં રાત્રી રોકાણ કર્યું હતું. એ દરમિયાન તેણે સુરતથી અમદાવાદ વચ્ચેના સંખ્યાબંધ શહેરો-ગામોનો પ્રવાસ કર્યો હતો. તે શનિવારે વિરમગામ પહોંચ્યો હતો અને બાદમાં સૌરાષ્ટના વિવિધ ગામોમાં પ્રવાસ કર્યો હતો.

હાર્દિક પટેલનો ક્રેઝ જેલવાસ બાદ પણ હજુ તેવો જ છે તેનો પરચો શુક્રવારે રાત્રે શહેરના વસ્ત્રાલ, નિકોલ, ઠક્કરબાપાનગર વિગેરે વિસ્તારમાં જોવા મળ્યો હતો. વડોદરાથી રાત્રે 12 વાગે આવેલા હાર્દિકના સ્વાગત માટે યુવાનો, મહિલાઓ સહિત સેંકડો લોકો કલાકો સુધી ઊભા રહ્યા હતા. હાર્દિક આવતા વેંત પાટીદાર કા શેર આયા અને જય સરદાર-જય પાટીદારના નારાથી સમગ્ર વિસ્તાર ગાજી ઉઠ્યો હતો. હાર્દિકની સાથે હાથ મિલાવવા, તેને ફૂલનો હાર પહેરાવવા અને અને તેની સાથે તસવીર પડાવવા યુવાનોએ પડાપડી કરી નાખી હતી અને હાર્દિકના કાફલાને વારંવાર અટકાવ્યો હતો. રાત્રે મોડુ થતા હાર્દિકે નિકોલ જવાનું માંડી વાળતા ત્યાં ઊભેલા હજારો લોકો ગુસ્સે ભરાયા હતા.

સુરતથી રોડ-શો કરીને હાર્દિક રાત્રે પૂર્વના પાટીદારોને મળવા આવી પહોંચ્યો હતો. જયાં પહેલેથી તેને આવકારવા મોટી સંખ્યામાં લોકો ઘર બહાર આવી ગયા હતા. યુવાનો પોતાની બાઇક અને કાર સાથે તેની સાથે જોડાઇ ગયા હતા. બાલિકાઓ દ્વારા તેને રક્ષા પોટલી બાંધવામાં આવી હતી. રીંગ રોડ પર ખાસ કરીને યુવા વર્ગ તેને મળવા તેની ગાડી સુધી પહોંચી ગયો હતો અને તેની સાથે સૂત્રો પોકારીને હાર્દિકને સમર્થન આપ્યું હતું. નિરાંત ચોકડી ખાતે પણ આખો રોડ પાટીદારોથી ભરચક હતો અને હાર્દિકના આગમન સાથે તેને જય પાટીદારના નારા સાથે વધાવી લીધો હતો. તેના વાહનની આજુબાજુ સેંકડો લોકો ખસવાનું નામ ન લેતા પોલીસ પણ લાચાર થઇ ગઇ હતી. સરદાર પટેલ ગ્રૂપના પ્રમુખ લાલજીભાઇ પટેલ અને એસપીજીના અગ્રણીઓએ પણ તેને આવકાર્યો હતો. જો કે અકળ કારણસર તે લાલજીભાઇ સાથે રોડ-શો કરવાથી દૂર રહ્યો હતો અને બન્ને થોડીવાર માટે ઔપચારિક રીતે મળીને છૂટા પડયા હતા. રામજી મંદિર ખાતે પણ લોકો તેને નિહાળવા ઊભા રહી ગયા હતા. નિકોલમાં સરદાર પટેલ પ્રતિમા પાસે પણ તેને આવકારવા સ્થાનિક રહીશો મોડી રાત સુધી ઊભા રહ્યા હતા.

હાર્દિક મોડુ થઇ ગયું હોવાના નામે ત્યાં ગયો ન હતો. જેના કારણે નિકોલના યુવાઓ તેની પર રોષે ભરાયા હતા. પોલીસ તંત્ર દ્વારા પણ મોડી રાત સુધી હજ્જારો લોકો રસ્તા પર હોવાથી ભારે બંદોબસ્ત ગોઠવી દેવામાં આ‌વ્યો હતો. હાર્દિક સાથે સતત પોલીસ એસ્કોર્ટ અને મુવિંગ સ્કવોડને રાખવામાં આવી હતી.

શનિવારે વિરમગામ પહોંચ્યા બાદ ત્યાં પોતાના પરિવારને મળી હાર્દિક સાળંગપુર, લાઠીદડ, બોટાદ, જસદણ, આટકોટ, દેરડી કુંભાજી થઈને ગોંડલ પહોંચ્યો હતો. ઠેરઠેર સ્વાગત બાદ કાગવડમાં ખોડલધામ ખાતે ૧૦ હજારથી વધુ પાટીદારનો કાફલો પહોંચ્યો હતો. હાર્દિક માતાજીની આરતી ઉતારી આશીર્વાદ લઈને આગળ વધ્યો હતો. જેતપુર, ધોરાજી થઈને કાફલો સીદસર પહોંચ્યો હતો. સીદસરમાં માતાજીના દર્શન કરી રાત્રે રાજકોટ પહોંચતા રોડ-શો યોજાયો હતો.

હાર્દિકના સ્વાગતના માનમાં બોટાદ જિલ્લાના લાઠીદડમાં પાટીદાર સમાજ દ્વારા રક્તદાન કેમ્પનું આયોજન કરવામાં આવ્યું હતું. આ કેમ્પમાં ૨૦૦થી વધુ બોટલ લોહી એકઠું થયું હતું. મહત્વનું છેકે, લાઠીદડમાં એકઠા થયેલા ચાર હજારથી વધુ પાટીદારોએ હાર્દિકના કાફલાનું સ્વાગત કર્યું હતું.

ઉલ્લેખનીય છે કે, મહેસાણા જિલ્લામાં તેને 9 મહિના સુધી પ્રવેશબંધી હોવાથી ત્યાં જઇ શક્યો ન હતો.