આમના ઘરે ઉદેપુરમાં છ મહિના રહેશે હાર્દિક પટેલ

નવગુજરાતસમય.કોમ

હાર્દિક પટેલને જે શરતોને આધારે જામીન મળ્યા છે તે અનુસાર, તેને છ મહિના સુધી ગુજરાતની બહાર રહેવાનું છે. અત્યારસુધી હાર્દિક ક્યાં રહેશે તે અંગે અનેક અટકળો હતી. હાર્દિક દિલ્હી, મુંબઈ કે પછી રાજસ્થાનમાં રહેશે તેવી અટકળો હતી. જોકે, આજે હાર્દિકના વકીલે લાજપોર જેલમાં જે ડોક્યુમેન્ટ્સ જમા કરાવ્યા તેમાં તે રાજસ્થાનના ઉદેપુરમાં રહેવાનો હોવાનું દર્શાવતા હાર્દિક રાજસ્થાન રહેવાનો હોવાનું સ્પષ્ટ થઈ ગયું હતું.

હાર્દિકે ઉદેપુર પર જ પસંદગી કેમ ઉતારી તે અંગે પણ ચર્ચા થઈ રહી છે ત્યારે હાર્દિક ઉદેપુરમાં જેમના ઘરે રહેવાનો છે તે રાજસ્થાનના કોંગ્રેસના પૂર્વ ધારાસભ્ય પુષ્કરલાલ પટેલનું હોવાનું બહાર આવ્યું છે. હાર્દિકનું ઉદેપુરનું એડ્રેસ 190, શ્રીનાથ નગર, માઉન્ટ વ્યૂ સ્કૂલ, નંદ નગર સોસાયટી, એરપોર્ટ રોડ, ધ્રુજુની બાવડી રહેશે.

જેમના ઘરમાં હાર્દિક રહેવાનો છે તે પુષ્કરલાલ પટેલ પોતે રાજસ્થાન પટેલ સમાજના અધ્યક્ષ છે. તેમણે એક ન્યૂઝ ચેનલને જણાવ્યું હતું કે, કોર્ટે હાર્દિકને શરતી જામીન આપ્યા તે વખતે જ તેમણે હાર્દિક ઉદેપુરમાં આવીને રહે તેવો પ્રસ્તાવ મૂક્યો હતો. પાટીદાર આંદોલનને ગુજરાતમાં આવીને પોતે સમર્થન આપ્યું હોવાનું પણ તેમણે જણાવ્યું હતું. પુષ્કરલાલે કહ્યું હતું કે, રાજકારણ અને સમાજનું આંદોલન અલગ વાત છે. હાર્દિક સમાજ માટે કામ કરી રહ્યો છે.