રાહતના સમાચારઃ અપર સર્ક્યુલેશન પાકિસ્તાન તરફ ફંટાયું

અમદાવાદ: અમદાવાદમાં ગઈકાલે પડેલા મુશળધાર વરસાદે સર્વત્ર પાણી-પાણી કરી નાંખ્યું છે. બુધવારે રાતથી અત્યાર સુધીમાં ખાબકેલા ભારે વરસાદના કારણે ઠેર ઠેર પાણી ભરાઈ ગયા હતા. તો બીજી તરફ હવામાન વિભાગે રાજ્યમાં આગામી 48 કલાકમાં હજુ ભારે વરસાદની આગાહી કરી હતી. જોકે હવે અપર સર્ક્યુલેશન પાકિસ્તાન તરફ ફંટાઈ જતા હવામાન વિભાગે આગામી 24 કલાકમાં અતિભારે વરસાદમાંથી સમાન્ય વરસાદની આગાહી કરી છે. ગત 48 કલાકમાં અમદાવાદમાં પડેલા ભારે વરસાદને પગલે 6 જેટલી NDRFની ટીમો કાર્યરત હતી અને અસરગ્રસ્તોને સલામત સ્થળે ખસેડવાની કાર્યવાહી હાથ ધરાઈ હતી. શહેરના મોટાભાગના અંડરબ્રીજમાં પાણી ભરાઈ જતાં બંધ કરી દેવા પડ્યા હતા. ઉપરાંત શહેરના 30 જેટલા માર્ગોમાં પાણી ભરાઈ ગયા હતા. ગાંધીનગરના સંત સરોવરમાંથી સાબરમતી નદીમાં 61000 ક્યૂસેક પાણી છોડાતાં સાબરમતી નદીમાં પૂરની શક્યતા પણ વ્યક્ત કરાઈ રહી છે. જેથી શહેરીજનોને રીવરફ્રન્ટ પર ન જવા મેયર તેમજ મ્યુનિસિપલ કમિશનરે અપીલ કરી છે.

વધુ બે દિવસ સ્કૂલ-કોલેજો બંધ રહેશે

હવામાન વિભાગ દ્વારા પહેલા કરવામાં આવેલ ભારે વરસાદની આગાહીના પગલે આજે પણ તમામ સ્કૂલ-કોલેજો બંધ રહી હતી. છેલ્લા ત્રણેક દિવસથી સ્કૂલ-કોલેજો બંધ છે. ત્યારે રાજ્યના શિક્ષણ વિભાગ દ્વારા 28 અને 29 જુલાઈ, એમ વધુ બે દિવસ અમદાવાદ શહેર અને જિલ્લાની સ્કૂલ-કોલેજો બંધ રાખવાની જાહેરાત કરવામાં આવી છે.