અમદાવાદમાં ભાદરવી મેઘે જમાવટ કરી, ઠેર ઠેર પાણી ભરાયાં

નવગુજરાત સમય.કોમ
છેલ્લા ઘણા દિવસોથી રાજ્યભરના અન્ય જિલ્લાઓમાં ભારે વરસાદ પડી રહ્યો છે, ત્યારે રવિવારે સાંજે અમદાવાદ શહેરના વાતાવરણમાં પલટા સાથે આકાશમાં કાળાં વાદળ છવાયાં હતાં. સમગ્ર શહેરમાં ભારે પવન સાથે વરસાદ પડ્યો હતો. જેને કારણે અમદાવાદીઓની રવિવારની સાંજ મજેદાર રહી હતી. જ્યારે જૂનાગઢ, અમરેલી, રાજકોટના ઉપલેટા તથા ધોરાજી સહિત સૌરાષ્ટ્રમાં કેટલીક જગ્યાઓએ વરસાદ પડ્યો હતો. અપર એર સાઇકલોનિક સિસ્ટમ સર્જાતા સૌરાષ્ટ્ર અને મધ્ય અને દક્ષિણ ગુજરાતમાં ફરી વરસાદની જમાવટ થઈ છે. આ સિસ્ટમને કારણે ખાસ તો દક્ષિણ ગુજરાત અને સૌરાષ્ટ્રમાં વધુ વરસાદની સંભાવના હવામાન વિભાગે વ્યક્ત કરી છે. વરસાદને લીધે વિમાન વ્યવહાર પર પણ અસર થઈ છે. રવિવારે અમદાવાદથી મુંબઈ જતી કેટલીક ફ્લાઇટ્સ મોડી ટેકઓફ થઈ હતી.

અમદાવાદમાં રવિવારે સવારથી જ વરસાદી માહોલ સર્જાયો હતો પરંતુ દિવસભર રાહ જોવડાવ્યા પછી ભારે પવન સાથે વરસાદ તૂટી પડ્યો હતો. અમદાવાદના મોટા ભાગના વિસ્‍તારોમાં સાંજે જોરદાર તોફાની પવન સાથે વરસાદ પડયો હતો. શહેરમાં વેજલપુર, જુહાપુરા, વસ્ત્રાપુર, વિજય ચાર રસ્‍તા, ડ્રાઇવ ઇન રોડ, નવરંગપુરા, આશ્રમ રોડ સહિતના વિસ્‍તારોમાં થોડા સમય માટે ધોધમાર વરસાદ પડયો હતો. ભારે વરસાદને કારણે શહેરના અલગ અલગ નીચાણ વાળા વિસ્તારોમાં પાણી ભરાયા હતાં. જેમાં નારોલ થી નરોડા સુધી હાઇવે પર ઠેરઠેર પાણી ભરાયા,જશોદાનગર, મણીનગર, ખોખરા ઓવરબ્રિજ પાસે, અમરાઈવાડી,નરોડા સહિતના વિસ્તારોમાં પાણી ભરાયા હોવાના સમાચારો મળી રહ્યા છે.

વરસાદ પડ્યો તે પહેલા શહેરભરમાં કાળાં ડિબાંગ વાદળ છવાઈ ગયાં હતાં. સાથે ભારે પવન અને ધૂળની ડમરીઓ ઊડવા લાગી હતી. હવામાન ખાતાએ આગામી 24 કલાક ભારે વરસાદની આગાહી કરી હતી. વરસાદ પડવાથી ગરમીથી ત્રસ્ત શહેરીજનોને ઠંડકનો અનુભવ થયો હતો.
અમદાવાદમાં રવિવારે મહત્તમ તાપમાન 31.4 અને લઘુતમ તાપમાન 26.6 ડિગ્રી નોંધાયું હતું.