અમદાવાદના અનેક વિસ્તારોમાં મોડી સાંજે પડ્યો જોરદાર વરસાદ

અમદાવાદ: આ વર્ષે ગુજરાતમાં 100% કરતા પણ વધારે વરસાદ પડી ગયો છે. ગુજરાતમાં 40 ઈંચ વરસાદ પડી ગયો છે જે સામાન્ય કરતા 10 ઈંચ વધારે છે. ગુજરાતમાં ભારે વરસાદના કારણે વડોદરામાં વિશ્વામિત્રી, ભરૂચમાં નર્મદા અને સૌરાષ્ટ્રમાં પોરબંદર પંથકમાં પૂરની સ્થિતિ સર્જાઈ છે. અનેક જગ્યાએ એનડીઆરએફની ટીમને એલર્ટ રાખવામાં આવી છે. જ્યારે અમદાવાદમાં પણ હવે વરસાદી માહોલ જામ્યો છે. જ્યાં એકબાજુ અમદાવાદમાં ગઈકાલે બપોરે 2થી 5 વાગ્યાના સમયગાળામાં સરેરાશ 2 ઈંચ વરસાદ પડ્યો હતો ત્યારે આજે મોડી સાંજે અમદાવાદમાં અનેક વિસ્તારોમાં ધોધમાર વરસાદ શરૂ થયો છે.

ગુજરાતના 94 તાલુકાઓમાં સિઝનનો 40 ઈંચ વરસાદ નોંધાઈ ચૂક્યો છે. જેમાં 103 ડેમ 100% કરતા વધુ ભરાયા છે. આ વખતે સૌથી વધુ વરસાદ કચ્છમાં 251.66 ટકા વરસાદ નોંધાયો છે. સૌરાષ્ટ્રમાં 162.64 ટકા, દક્ષિણ ગુજરાતમાં 102.45 ટકા, ઉત્તર ગુજરાતમાં 101.72 ટકા અને પૂર્વ મધ્ય ગુજરાતમાં 87.56 ટકા સરેરાશ વરસાદ નોંધાયો છે.

રાજ્યમાં વરસાદની પરિસ્થિતિ અંગે ચર્ચા કરાઇ છે અને NDRF દ્વારા રેસ્ક્યૂની કામગીરી પણ કરવામાં આવી રહી છે. અત્યાર સુધી રાજ્યમાં 120 ટકા વરસાદ નોંધાયો છે. આજથી વરસાદનું પ્રમાણ ઘટ્યું છે. સરદાર સરોવર નર્મદા ડેમમાંથી પાણી છોડવામાં આવતા નર્મદા નદીએ રૌદ્ર સ્વરૂપ ધારણ કર્યું છે. છેલ્લા કેટલાંક દિવસોથી નર્મદા નદીના જળસ્તરમાં સતત વધારો થઇ રહ્યો છે, જેના પગલે વડોદરા-ભરૂચમાં નીચાણવાળા વિસ્તારમાં આવેલા ગામોમાં પાણી ઘુસવાની શરૂઆત થઇ ગઇ છે. ભરૂચની આસપાસના ગામમાંથી પાંચ હજાર લોકોનું સલામત સ્થળે સ્થળાંતર કરાયું છે.