સૌરાષ્ટ્ર અને દક્ષિણ ગુજરાતમાં આગામી 5 દિવસ ભારે વરસાદની આગાહી

અમદાવાદ: સૌરાષ્ટ્ર અને દક્ષિણ ગુજરાતમાં આગામી 5 દિવસ (30 જુલાઈથી 3 ઓગસ્ટ) ભારે વરસાદની હવામાન વિભાગ દ્વારા આગાહી કરવામાં આવી છે. જ્યારે અમદાવાદ સહિતના વિસ્તારોમાં વરસાદી ઝાપટા પડે તેવી શક્યતાઓ છે. મીડિયા રિપોર્ટ મુજબ અત્યાર સુધી રાજ્યમાં સીઝનનો સરેરાશ 41 ટકા વરસાદ વરસી ચૂક્યો છે. સાયક્લોનિક સર્ક્યુલેશન એક્ટિવ થતા ગુજરાતમાં વધુ સારો વરસાદ પડશે તેવી સંભાવના છે. હવામાન વિભાગ મુજબ આવતીકાલથી 3 ઓગસ્ટ સુધી ભારેથી અતિભારે વરસાદ પડી શકે છે.

તારીખ મુજબ ક્યાં પડશે વરસાદ?
હવામાન વિભાગ મુજબ આવતીકાલે દક્ષિણ ગુજરાતના નવસારી, વલસાડ અને ડાંગ જ્યારે સૌરાષ્ટ્રમાં અમરેલી અને ભાવનગરમાં ભારેથી અતિભારે વરસાદ પડશે. વરસાદની સાથે પવન પણ ફૂંકાશે. 31મી જુલાઈએ નવસારી, વલસાડ જ્યારે સૌરાષ્ટ્રમાં અમરેલી ભાવનગર અને ગીરસોમનાથમાં ભારે વરસાદની સંભાવના છે. જ્યારે 1 ઓગસ્ટથી 3 ઓગસ્ટ દરમિયાન વલસાડ, દમણ, દાદરા નગર હવેલી, જુનાગઢ, અમેરલી, દ્વારકા અને પોરબંદરમાં ભારે વરસાદ પડવાની હવામાન વિભાગે આગાહી કરી છે.

ભારેથી અતિભારે વરસાદ પડવાની શક્યતા
હવામાન વિભાગના જણાવ્યા મુજબ દક્ષિણ ગુજરાતના ડાંગ, વલસાડ, નવસારી તેમજ કેન્દ્રશાસિત પ્રદેશોમાં દાદરાનગર હવેલી અને દીવમાં ભારે વરસાદની સંભાવના છે. જ્યારે સૌરાષ્ટ્રમાં ભાવનગર, અમરેલી, દ્વારકા પોરબંદર, ગીરસોમનાથમાં વરસાદ પડશે. જ્યારે આસપાસના વિસ્તારોમાં વાદળછાયું વાતાવરણ રહેશે અને વરસાદી ઝાપટા પડવાની શક્યતા છે.