Jio: અમદાવાદીઓએ કાર્ડ લેવા લગાવી આવી લાઈન

અમદાવાદ: મુકેશ અંબાણીએ જિયોનું લોન્ચિંગ કર્યું છે ત્યારથી જ આખા દેશમાં લોકોએ તેનું સિમકાર્ડ લેવા માટે પડાપડી શરુ કરી દીધી છે. અમદાવાદીઓ પણ તેમાંથી બાકાત નથી. શહેરમાં પણ રિલાયન્સ 4Gના સિમકાર્ડની જોરદાર ડિમાન્ડ છે. શુક્રવારે અમદાવાદીઓએ રિલાયન્સ ડિજિટલના સ્ટોર્સ પર તેની નવા સિમકાર્ડની ઈન્કવાયરી કરવા તેમજ તેને ખરીદવા માટે લાંબી લાઈનો લગાવી હતી. આમ તો રિલાયન્સ ડિજિટલ એક્સપ્રેસ સ્ટોર્સ પર આ કાર્ડ ફ્રીમાં વેચાઈ રહ્યા છે, પરંતુ તેનો સ્ટોક ખલાસ થઈ ગયો હોવાથી અમદાવાદીઓ પૈસા આપીને પણ તેને ખરીદવા તૈયાર હતા.



સુભાષ બ્રિજ વિસ્તારમાં આવેલા રિલાયન્સના સ્ટોર પર કલાકો સુધી લાઈનમાં ઉભા રહેલા વિશાલ શાહે જણાવ્યું હતું કે, ‘અહીં ટોકન નંબર લેવા માટે પણ મારે કલાક સુધી લાઈનમાં ઉભા રહેવું પડ્યું હતું. આખરે છેક સાંજે મને જે સમય અપાયો હતો તેનાથી પણ એક કલાક મોડું મને કાર્ડ મળ્યું હતું. મારી પાછળ 150 લોકો લાઈનમાં ઉભા હતા.’

જૈમિન ત્રિપાઠી નામના એક શહેરીજને જિયોનું સિમકાર્ડ લેવા અનેક સ્ટોર્સ પર તપાસ કરી હતી, પરંતુ ઘણી જગ્યાએ સ્ટોક ખલાસ થઈ ગયો હતો. આખરે એક જગ્યાએ કાર્ડ હતા, પરંતુ તેને લેવા માટે તેમને છેલ્લી ઘડીએ ડોક્યુમેન્ટ્સ માટે દોડધામ કરવી પડી હતી. બીસીએના સ્ટૂડન્ટ વ્રજેશનને આ કાર્ડ ફ્રી ઈન્ટરનેટ માટે લેવું હતું, પરંતુ તેના માટે તેને પંચવટી પર આવેલા સ્ટોર પર કલાકો સુધી રાહ જોવી પડી હતી.