HIVકાંડ: 45 દિવસમાં રિપોર્ટ આપવા CBIની બાંયધરી

નવગુજરાત સમય > અમદાવાદ

– જૂનાગઢમાં વર્ષ 2011માં થયેલા એચઆઇવી કાંડ મામલે સીબીઆઇ યેન કેન પ્રકારે તપાસમાં વિલંબ કરી રહી છે અને વધુ તપાસનો અહેવાલ રજૂ કરી રહી નથી. ત્યારે આ કેસમાં ગુરુવારે મુદત હોવાથી સીબીઆઇ કોર્ટે આકરું વલણ અપવનાવ્યું હતું જેથી સીબીઆઇએ 45 દિવસમાં જ વધુ તપાસનો અહેવાલ રજૂ કરવા લેખીતમાં બાંહેધરી આપી હતી. જેથી કોર્ટે આ મામલે વધુ સુનાવણી 9 સપ્ટેમ્બરના રોજ મુલતવી રાખી છે. વર્ષ 2011માં જૂનાગઢમા એચઆઇવી અસરગ્રસ્ત લોહી બાળકોને ચઢાવતા 28 બાળકો એચઆઇવીનો ભોગ બન્યા હતા જેમાંથી પહેલાં 5 અને પછી ત્રણ એમ કુલ ૮ બાળકોના મૃત્યુ થઇ ચુક્યા છે. આ કેસમાં હાઇકોર્ટે સીબીઆઇને તપાસ સોંપી હતી. જેમાં તપાસ કરી સીબીઆઇએ ક્લોઝર રિપોર્ટ સીબીઆઇ કોર્ટમાં રજૂ કર્યો હતો. જો કે, ભોગ બનનારે વિરોધ કર્યો હતો. જેથી કોર્ટે આ મામલે વધુ તપાસના આદેશ કરી 60 દિવસમાં રિપોર્ટ રજૂ કરવા આદેશ કર્યો હતો. જો કે, સીબીઆઇએ છ મહિનાથી તપાસ માટે સમય માગી રહી છે અને રિપોર્ટ રજૂ કરાતો નથી. આ મામલે ગુરુવારે સુનાવણી હતી, પણ સીબીઆઇએ તપાસ અહેવાલ રજૂ કર્યો ન હતો. વધુ તપાસ માટે 45 દિવસનો સમય લેખિતમાં માગ્યો હતો અને રિપોર્ટ રજૂ કરશે તેવી બાંહેધરી આપી હતી. જે કોર્ટે ગ્રાહ્ય રાખી હતી. નોંધનીય છે કે, સીબીઆઇએ તપાસમાં મોટા ગોટાળા કર્યા હોવાનો આક્ષેપ ભોગબનનાર તરફે કરવામાં આવ્યો હતો.