શિક્ષકોના HRAના મુદ્દે ઉચ્ચ સ્તરીય સમિતિ રચી નિર્ણય લો

નવગુજરાત સમય > અમદાવાદ

અમદાવાદ, વડોદરા સહિતના શહેરી વિસ્તારોની આજુબાજુના ગ્રામ્ય વિસ્તારોની શાળાઓના હજારો શિક્ષકોને રાહતરૂપ ચુકાદામાં હાઇકોર્ટના જસ્ટિસ જે.બી.પારડીવાલાએ રાજ્ય સરકારને શિક્ષકોના હાઉસ રેન્ટ એલાઉન્સ (HRA) ના મુદ્દે ઉચ્ચ સ્તરીય સમિતિ બનાવી નિર્ણય લેવા આદેશ કર્યો છે. આ સમિતિને તેનો અહેવાલ છ મહિનાની અંદર તૈયાર કરવાનો આદેશ કરવામાં આવ્યો છે.

તેની સાથે સાથે અમદાવાદ સહિતના શહેરોની આઠ કિમીની ફરતે આવેલી ગ્રામ્ય વિસ્તારોની શાળાઓ અને શિક્ષકોની યાદી તૈયાર કરવાનો આદેશ કર્યો છે. જ્યારે કે HRA અને કમ્પેન્સેટ્રી લોકલ એલાઉન્સ (CLA)નો લાભ અરજદાર શિક્ષકો કે તમામ શિક્ષકોને મળશે તે સરકારની નીતિને આધિન હોવાનું ઠેરવી રિટનો નિકાલ કર્યો હતો.

આ કેસમાં ૫૦થી વધુ અરજદાર શિક્ષકોએ હાઇકોર્ટ સમક્ષ રિટ પિટિશન કરી હતી. જેમાં એવી રજૂઆત કરાઈ હતી કે,’અમદાવાદ, વડોદરા, રાજકોટ, સુરત જેવા શહેરોની આજુબાજુના વિસ્તોરામાં હજારો શિક્ષકો નોકરી કરે છે. જેઓ કોર્પોરેશન, પંચાયત અથવા સરકારી શાળાઓમાં પોતાની ફરજ બજાવે છે. આ મોટાભાગની શાળાઓ ગ્રામ્ય વિસ્તારોમાં આવેલી છે. રાજ્ય સરકારકે HRA આપવા માટેનો નિયમ બનાવ્યો છે. જેમાં એવી જોગવાઇ કરેલી છે કે ગ્રામ્ય વિસ્તારોમાં જ્યાં શિક્ષકો નોકરી કરે છે, ત્યાં યોગ્ય મકાન ના હોવાથી તેઓ શહેરોમાં રહે છે, તેથી HRA મેળવવાને પાત્ર છે.