સાળી તેના ફિયાન્સે સાથે ફરવા જતા જીજાજીને વાંધો પડ્યો, વિફરેલી પત્નીએ બચકાં ભરી લીધાં

અમદાવાદઃ શહેરના વાસણા વિસ્તારમાં સાળી મુદ્દે પતિ-પત્નીમાં ઝઘડાનો ચોંકાવનારો મામલો સામે આવ્યો છે. જેમાં સગાઈ બાદ સાળી પોતાના ફિયાન્સ સાથે ફોન પર લાંબી વાતો કરતી હોઈ તથા ફરવા જતી હોવાથી જીજાજીને વાંધો પડ્યો. જે બાદ વિફરેલી પત્ની તથા સાસરીયાંએ જમાઈ તથા તેના માતા પર હુમલો કર્યો હતો. આ દરમિયાન પત્નીએ પતિને બચકાં ભરી લીધા હતા. જેથી પીડિત પતિએ પત્ની વિરુદ્ધ વાસણા પોલીસમાં ફરિયાદ નોંધાવી હતી.

સ્થાનિક ન્યૂઝ રિપોર્ટ મુજબ, વાસણાના કેશવનગર છાપરમાં રહેતા 20 વર્ષીય દીપક મારવાડી છૂટક મજૂરી કરીને પરિવારનું ગુજરાન ચલાવે છે. દીપકની સાળી સીતા બહેનની સગાઈ જીતુ મારવાડી નામના યુવક સાથે થઈ હતી. આ બાદ સીતા આખો દિવસ ફોન પર જીતુ સાથે વાતો કરતી રહેતી તથા તેની સાથે ફરવા માટે જતી હોવાથી દીપકે પોતાની પત્ની જ્યોતિ સામે અણગમો વ્યક્ત કર્યો હતો. જેથી ગુરુવારે રાત્રે 10 વાગ્યે જ્યોતિએ ઝઘડો કર્યો અને બાજુમાં રહેતી મહિલાના ઘરે જતી રહી હતી.

આ બાદ શુક્રવારે સવારે 11 વાગ્યા આસપાસ જ્યોતિ તેના ફોઈ રૂપા બહેન, કાકી ચંપાબહેન તથા ફુવા અનિલભાઈ સાથે આવી હતી અને દીપક તથા તેના માતા સાથે ઝઘડો કરીને સાસુ પર હુમલો કરી દીધો હતો. જ્યારે જ્યોતિએ પતિને માર મારીને તેને બચકા ભરી લીધા હતા. એવામાં દીકરીને બચાવવા વચ્ચે પડેલા સાસુને પણ વહુના સાસરીયા પક્ષે માર માર્યા હતા.

બનાવને પગલે દીપકે બૂમાબૂમ કરતા આસપાસના લોકો ત્યાં મદદ માટે દોડી આવ્યા હતા. તેમણે ઈજાગ્રસ્ત દીપક તથા તેની માતાને સોલા સિવિલ હોસ્પિટલ ખસેડ્યા હતા. બાદમાં દીપકે પોતાની પત્ની તથા અન્ય આરોપીઓ વિરુદ્ધ ફરિયાદ નોંધાવી હતી.