અ'વાદઃ પ્રેમિકા સાથે પકડાયેલા પતિની પત્નીને ધમકી, 'છૂટાછેડા નહીં આપે તો આપઘાત કરીશ'

અમદાવાદઃ શહેરના કૃષ્ણનગરમાં રહેતી એક મહિલાએ પોતાના પતિને પ્રેમિકા સાથે ઝડપી પાડ્યો હતો. જોકે પ્રમિકા સાથે ઝડપાયેલા પતિએ પત્ની જ ધમકી આપી દીધી કે તે તેને છૂટાછેડા નહીં આપે તો આપઘાત કરી લેશે. આ ઉપરાંત મહિલાનો આરોપ છે કે તેના સાસરીયા પણ અવારનવાર તેની પાસે દહેજની માગણી કરીને શારીરિક અને માનસિક ત્રાસ આપતા હતા. આખરે કંટાળીને મહિલાએ કૃષ્ણનગર પોલીસ સ્ટેશનમાં ફરિયાદ નોંધાવી હતી.

ઘટનાની રિપોર્ટ મુજબ, શહેરના કૃષ્ણનગરમાં રહેતી 37 વર્ષની ભારતી નામની મહિલાના 2009માં લગ્ન થયા હતા. લગ્ન બાદ તે પોતાના સાસરિયા સાથે સૈજપુરમાં રહેતી હતી. જોકે લગ્નના બે વર્ષ બાદ તેનો પતિ, સાસુ-સસરા તથા નણંદ અને દિયર પિયરમાંથી ઓછું કરિયાવર લાવવા તથા કામકાજને લઈને તેને માનસિક ત્રાસ આપતા હતા. પોતાનો સંસાર બચાવવા ભારતી આ તમામ ત્રાસ સહન કરતી રહી. મહિલાએ પોતાના પતિને વાત કરી તો તેને ઘરમાંથી કાઢી મૂકવાની ધમકી અપાઈ.

આ બાદ પતિએ મહિલા પાસે 10 લાખ રૂપિયાના દહેજની માગણી કરી. જોકે મહિલાએ જણાવ્યું કે તેના પિતા આટલા પૈસા આપી શકે તેમ નથી. આ બાદ પતિએ તેને ઘરમાંથી જતા રહેવા કહ્યું અને આમ ન કરવા પર આપઘાત કરવાની ધમકી આપી દીધી. આ બાદ ભારતી પોતાના દીકરા સાથે પિયરમાં જતી રહી. લાંબો સમય થવા છતાં પતિ કે સાસરિયા તેને લેવા ન આવતા તેણે કોર્ટમાં છૂટાછેડા માટે અરજી કરી.

આ દરમિયાન ત્રણ મહિના પહેલા ભારતીને તેનો પતિ રસ્તામાં અન્ય કોઈ મહિલા સાથે જોવા મળી ગયો. આ બાબતે તેણે પૂછતા પતિએ તેને જણાવ્યું કે, 'તે આ મહિલા સાથે લગ્ન કરવાનો છે અને જો તું છૂટાછેડા નહીં આપે તો તને અને તારા દીકરાને જાનથી મારી નાખીશું.' આ ધમકી બાદ ભારતીએ કૃષ્ણનગરના પોલીસ સ્ટેશનમાં પોતાના સાસરિયાઓ સામે ફરિયાદ નોંધાવી હતી. હાલ પોલીસ આ મામલે તપાસ કરી રહી છે.