હાર્દિક ગુજરાતનો હિટલર હોય તેમ શાસન કરવા માગે છે: તરુણ ગજ્જર

અમદાવાદ: હાર્દિક પટેલને લાફો મારનારા તરુણ ગજ્જરે હાર્દિક પર આરોપ લગાવતા જણાવ્યું છે કે હાર્દિક એવું સમજે છે કે તે ઈચ્છે તે જ ગુજરાતમાં થવું જોઈએ. તે ગુજરાતનો હિટલર હોય તેમ શાસન કરવા માગે છે. તેના લીધે સામાન્ય લોકો હેરાન થયા હતા. હાર્દિક કહે એવું જ ગુજરાતમાં થશે? તે સમાજના કોઈ વ્યક્તિનું સાંભળતો નથી. તેના સમાજમાં અનેક ધૂરંધર વ્યક્તિઓ છે, તેની તે ગણતરી જ કરતો નથી. તેણે કહ્યું હતું કે, મને કોંગ્રેસ કે ભાજપ સામે કશોય વિરોધ નથી. પરંતુ હાર્દિકના જે વિચારો છે તે ગુજરાતના યુવાનોને ગેરમાર્ગે દોરી રહ્યા છે, અને મારો વિરોધ તેની સામે છે. તેના કારણે મારા દીકરાને જે તકલીફ પડી તેના લીધે મેં તને લાફો માર્યો છે. હું તેનો વિરોધ કરતો રહીશ. મેં કોઈના કહેવાથી તેનો વિરોધ નથી કર્યો. તરુણ ગજ્જરે જણાવ્યું હતું કે, 2015માં હાર્દિકે સભા કરી, પાટીદાર સમાજ માટે સારું કર્યું, તે વખતે મારી પત્ની પ્રેગનેન્ટ હતી, અને કલોલ તેની દવા ચાલતી હતી. અમે પાટીદાર આંદોલનને કારણે ઘણી તકલીફ સહન કરી. મારી પત્નીને ગર્ભપાત થતાં રહી ગયો. એક વાર મારો દીકરો બીમાર હતો, તે વખતે પણ કલોલ દવાખાને પહોંચવામાં અમને ખૂબ તકલીફ પડી. હાર્દિક ગમે ત્યારે ગુજરાત બંધ કરાવી દે છે, ગમે ત્યારે તકલીફ ઉભી કરાવે છે, ગમે ત્યારે નાત-જાત વચ્ચે મતભેદ ઉભા કરાવે છે. તેના કારણે 14 પાટીદાર યુવાનો મોતને ભેટ્યા. તે પાટીદાર સમાજ માટે કલંક કહેવાય. તેણે જે કર્યું એ, પરંતુ તેના કારણે સામાન્ય લોકો હેરાન થાય છે. હું ત્રણ વર્ષથી રાહ જોતો હતો. તેના કારણે હું ખૂબ હેરાન થયો. કલોલ દવાખાને પહોંચા અમારે રસ્તાઓ બદલી-બદલીને જવું પડતું.