અમદાવાદઃ પડોશણને જોવા કેમેરા લગાવ્યા, બાલ્કનીમાં આવે ત્યારે ગંદા ઈશારા કરતો

અમદાવાદના પૂર્વ વિસ્તારમાં આવેલા કૃષ્ણનગરમાં છેડતીની ઘટના સામે આવી છે. બાલ્કનીમાં સૂકવેલાં કપડાં લેવા ગયેલી પરણિતા સાથે પડોશી યુવકે છેડતી કર્યાનો બનાવ બન્યો છે. પરણિતા જોઈ યુવકે પેન્ટ ઉતારી બિભત્સ હરકતો કરી હતી. આ મામલે ઉગ્ર બોલાચાલી થતાં સમગ્ર મામલો કૃષ્ણનગર પોલીસ સ્ટેશન પહોંચ્યા છે. જે અંગે હાલ પોલીસે બન્ને પક્ષની ફરિયાદ નોંધી તપાસ હાથ ધરી છે.

પ્રાપ્ત માહિતી અનુસાર, કૃષ્ણનગર વિસ્તારમાં આવેલા એપાર્ટમેન્ટમાં રહેતા કપલે પડોશી દ્વારા અશ્લીલ અને અભદ્ર હરકત થતી હોવાની ફરિયાદ પોલીસ ચોપડે નોંધાવી છે. હાલના ટેકનોલોજીના સમયમાં ટેકનોલોજીના દુરપયોગ કઈ રીતે થાય તે બાબત પ્રકાશમાં આવી છે. જેમાં સીસીટીવીની મદદથી પડોશણ પર નજર રાખતા હોવાનો આક્ષેપ થયો છે. નેહા (નામ બદલ્યું છે ) તેના પતિ નિરજ (નામ બદલ્યું છે ) કૃષ્ણનગર વિસ્તારમાં આવેલા એપાર્ટમેન્ટમાં રહે છે. નેહા રોજ બાલ્કનીમાં આવે ત્યારે તેની સામેની બાલ્કનીમાં એક યુવક રોજ તેની સામે ઈશારા કરતો હતો. પણ પાડોશી સાથે કોઈ વિવાદ ન થાય અને નિરજ ઉશ્કેરાઈને કોઈ ઝઘડો ન કરે તે માટે કશું બોલતી ન હતી.

અશ્લીલ હરકતોથી કંટાળી આખરે મહિલાએ કરી ફરિયાદ

જોકે, આવું અનેક વખત બનતા મહિલાએ તેની જાણ તેના પતિને કરી હતી. જેથી તેનો પતિ પણ બાલ્કનીમાં ગયો હતો. જ્યાં એમણે જોયું તો તેમના ઘરના સામેના બ્લોકમાં લાગેલા સીસીટીવી કેમેરા (CCTV) તેમના ઘર તરફ કરી રહ્યો હતો. જેનો વાંધો ઉઠાવતા યુવક અને તેની પત્ની બિભત્સ ગાળો બોલી ઝઘડો કરવા લાગ્યા હતા. આ સમગ્ર મામલે બન્ને વચ્ચે ઉગ્ર બોલાચાલી થઈ હતી. જેથી કૃષ્ણનગર પોલીસે બન્ને તરફની આક્ષેપ પ્રતિ આક્ષેપ કરતી ફરિયાદ નોંધી હતી. આ અંગે હાલ પોલીસ દ્વારા તપાસ કરવામાં આવી રહી છે.

પોલીસ ફરિયાદ મુજબ જે બાદ યુવકની પત્નીએ ફરિયાદી મહિલાને ધમકી આપી હતી કે, તને અને તારા પેટમાં રહેલા બાળકને જાનથી મારી નાંખીશ અને ખોટા કેસમાં ફસાવી દઇશ. ત્યારે આજકાલ ટેક્નોલોજીનો કેટલો ગેરઉપયોગ થઈ શકે છે અને તેને લઈને કેવા કેવા કિસ્સા બને છે જેને જાણીને એક જાગૃત વ્યક્તિ તરીકે દરેકે સાવધાન રહેવાની જરુર છે.