અમદાવાદઃ એક તો માસ્ક ન પહેર્યું અને ઉપરથી પોલીસને કહે, 'દંડ ભરને કી બાત કી તો કાટ ડાલુંગા'

અમદાવાદઃ કોરોના સામેની લડાઈમાં છેલ્લા ઘણા સમયથી માસ્ક ન પહેરનાર સામે કાર્યવાહી કરવામાં આવી રહી છે. દુનિયાભરના વૈજ્ઞાનિકો અને ડોક્ટર્સે પણ સલાહ આપી છે કે ભલે વેક્સીન આવી જાય પરંતુ કોરોના સામે રક્ષણ માટે માસ્ક તો અનિવાર્ય રહેશે જ, જોકે કેટલાક લોકો હજુ પણ અમરપટ્ટો લખાવીને આવ્યા હોય તેમ માસ્ક પહેરતા જ નથી.

ઘણા લોકો આજે પણ કોરોના એક આભાસી બિમારી હોય તેમ બેફિકરાઈથી વર્તન કરે છે અને સમાજને આ મહામારીમાં બચાવવા માટે ખડેપગે રહેનારા ફ્રન્ટ લાઈન વોરિયર્સ સાથે રીતસર ઝગડી પડે છે. અમદાવાદ શહેરમાં પણ છેલ્લા ઘણા સમયથી જોવા મળે છે કે જ્યારે માસ્ક ન પહેરનાર લોકોને રસ્તા પર રોકે છે ત્યારે ઘણા એવા વાહનચાલકો છે જે પોલીસ સાથે સીધા ઘર્ષણમાં ઉતરતા હોય છે. આવો જ વધુ એક કિસ્સો મિર્ઝાપુર ખાતે બન્યો હતો. એક વાહન ચાલક માસ્ક પહેર્યા વગર ચાલુ વાહને ફોન પર વાત કરતો હતો ત્યારે તેને પોલીસે રોકતા તેણે પોલીસને "મુજે દંડ ભરને કી બાત કી તો કાટ ડાલુંગા" કહીને ધમકીઓ આપી હટીમ જેથીની શાહપુર પોલીસે તેની અટકાયત કરી ગુનો નોંધી કાયદેસરની કાર્યવાહી કરી હતી.

શાહપુર પોલીસ સ્ટેશનની દિલ્હી ચકલા પોલીસ ચોકીમાં ફરજ બજાવતા પીએસઆઇ એસ. એમ. સિસોદીયા તેમની ટિમ સાથે વિસ્તારમાં ફરજ પર હતા. આ દરમિયાન તેઓને માસ્ક ન પહેરનાર સામે કાર્યવાહી કરવાની હતી. ત્યારે માસ્ક ન પહેરનાર સામે કાર્યવાહી કરવા જતા એક વાહન ચાલક ત્યાંથી પસાર થયો હતો. ત્યારે મિર્ઝાપુર ઝેવિયર્સ સ્કૂલ પાસેથી એક વાહન ચાલક માસ્ક પહેર્યા વગર ફોન પર વાત કરતો જતો હતો.

એકતરફ આ વાહન ચાલકે માસ્ક પહેર્યું ન હતું અને બીજીતરફ તે ચાલુ વાહને મોબાઈલ ફોનથી વાત કરતો હતો. આમ બે બે ગુના કર્યા હોવા છતા પોતાની ભૂલ સ્વિકારવા તૈયાર ન હોતો અને ઉલ્ટા ચોર કોટવાલ કો દાંટેની જેમ જ્યારે પોલીસે તેને રોક્યો ત્યારે ભાઈ પોલીસ પર જ ગરજવા લાગ્યો હતો. પોલીસે કાયદો દેખાડીને વાહન ચાલકને દંડ ભરવા જણાવતા તે આવેશમાં આવી ગયો હતો અને કોઈનાથી ડરતો ન હોય તેમ ફરજ પરના જવાનો સાથે ઝગડી પડ્યો હતો.

આ શખશે પોલીસ સાથે ઘર્ષણ કરી કહ્યું કે "મેં કાહેકા દંડ ભરુ, મેં કોઈ દંડ ભરને વાલા નહિ હું તુમકો જો ઉખાડના હે વો ઉખાડ લો, ઔર મુજે દંડ ભરને કી બાત કી તો કાટ ડાલુંગા". ફરજ પર હાજર પોલીસકર્મીઓએ આ વ્યક્તિ કે જેનું નામ સઈદ ખાન પઠાણ હોવાનું સામે આવ્યું હતું તેની વિરુદ્ધ સરકારી ફરજમાં બાધા નાખવાની ફરિયાદ કરી હતી. જેથી શાહપુર પોલીસે આ માથાભારે વ્યક્તિ વિરુદ્ધ સરકારી ફરજમાં બાધા નાખવી અને સરકારી કર્મચારીને ધમકી આપવી, એપેડેમિક એક્ટ હેઠળ માસ્ક ન પહેરવું અને વાહન ચલાવતા ફોન વાપરવવા સહિતની બાબતે ગુનો નોંધી તેની ધરપકડ કરી હતી.