'કરિયાવરમાં 25 તોલા સોનું લાવી તો પણ સાસરીયા કહે છે, હોસ્પિટલ બનાવવી છે 50 લાખ લઈ આવ'

અમદાવાદમાં ઘરેલુ હિંસાના કિસ્સાઓ જાણે કે એક સામાન્ય બાબત બની ગયા હોય તેવું લાગી રહ્યું છે. શહેરના પોશ એલિસબ્રિજ વિસ્તારમાં રહેતી અને સેટેલાઈટમાં ડોક્ટર સાથે લગ્ન કરનારી પરિણીતા પાસે સાસરીયાઓએ 50 લાખના દહેજની માંગણી કરી હતી. તબીબે તેની પત્નીને શારીરિક અને માનસિક ત્રાસ આપી હોસ્પિટલ શરૂ કરવી હોવાથી રુપિયા નહી લાવે તો છુટાછેડા આપી દેવાની ધમકી આપી હતી. આ અંગે એલિસબ્રિજ પોલીસે ગુનો નોંધીને તપાસ હાથ ધરી છે.

એલિસબ્રિજમાં પ્રાંગણ એપાર્ટમેન્ટમાં રહેતા રૂહાનીબહેન ગોપીનભાઈ ઠાકોર(26)ના લગ્ન 2019માં સેટેલાઈટમાં દીપ બંગ્લોઝમાં રહેતા ધરણ હિરેનભાઈ શાહ (28) સાથે થયા હતા. ધરણ રાજસ્થાનમાં એમ.એસ. ઓર્થોપિડીકનો અભ્યાસ કરે છે. લગ્ન બાદ રૂહાનીબહેન સાસરીમાં સંયુક્ત પરિવાર સાથે રહેતા હતા. યુવતીનો આરોપ છે કે લગ્ન બાદ તેના સાસુ સસરા અને નણંદ મ્હેણાંટોંણા મારીને વારંવાર નાની નાની બાબતોમાં ત્રાસ આપતા હતા અને તેના માતા-પિતાએ 25 તોલા સોનાના દાગીના આપ્યા હોવા છતાં પણ તું કરયાવર પૂરતા પ્રમાણમાં લાવેલ નથી, તને કંઈ કામકાજ આવડતું નથી એવું કહીને માનસિક ત્રાસ આપતા હતા.

લગ્ન બાદ હનીમુન માટે તેઓ પતિ સાથે ગ્રીસ ગયા ત્યારે પણ તેની સાથે ખરાબ વર્તન કરતો હતો અને અંગત ખર્ચ માટે પૈસા આપતો ન હતો. પતિ રાજસ્થાનના ઉદેપુરમાં એમ.એસ ઓર્થોપેડિકનો અભ્યાસ કરે છે. પતિ જ્યારે અભ્યાસ માટે જયપુર ગયો ત્યારે સાસરીયા રૂહાનીબહેનને નોકરી માટે દબાણ કરતા તેમણે નોકરી પણ શરૂ કરી હતી. પરંતુ નોકરીના પગારના જે રુપિયા આવતા તે તેમના સાસુ લઈ લેતા હતા.

એટલું જ નહીં તેના સાસરીયા તેના પર શંકા કુશંકા રાખતા હતા અને ઘરમાં સીસીટીવી પણ લગાવ્યા હતા. તેમજ યુવતીના નણંદ તેને અવારનવાર ગર્ભધારણ કરવા માટે દબાણ કરતા હતા અને તેનો પતિ માસિક દરમિયાન અને આરોગ્ય સારું ન હોય તો પણ સંબંધ બાંધવા દબાણ કરતો હતો અને માર મારીને ગાળાગાળી કરતો હતો. યુવતીના પતિને અમદાવાદમાં એક હોસ્પિટલ શરૂ કરવાની હોય તેના માતા-પિતા પાસેથી રૂપિયા ૫૦ લાખ લઈ આવવા માટે પણ દબાણ કરતા હોવાનો ફરિયાદમાં ઉલ્લેખ કરવામાં આવ્યો છે. આમ શારીરિક અને માનસિક ત્રાસ આપ્યા બાદ ફરિયાદી યુવતીને ઘરમાંથી કાઢી મૂકતા તેને તેના પતિ સાસુ-સસરા અને નણંદ વિરોધમાં પોલીસ ફરિયાદ દાખલ કરાવી છે. પોલીસે આ સમગ્ર મામલે ફરિયાદ નોંધીને વધુ તપાસ શરૂ કરી છે.