ઝાપટાં શરુ, અમદાવાદમાં બે દિવસ રહેશે વરસાદી માહોલ

I am Gujarat

48 કલાક રહેશે વરસાદી માહોલ

અમદાવાદ (TNN): ત્રણ દિવસના વિરામ બાદ અમદાવાદના કેટલાક વિસ્તારોમાં ગુરુવારે સાંજે હળવા વરસાદી ઝાપટાં પડ્યા. હવામાન વિભાગની આગાહી પ્રમાણે, આગામી 48 કલાક સુધી શહેરમાં વરસાદી માહોલ રહેશે. ઉત્તર ગુજરાતના મોટા ભાગના વિસ્તારો અને સૌરાષ્ટ્રના અમુક વિસ્તારોમાં વરસાદ પડશે.

રાજ્યમાં ત્રણ સિસ્ટમ સક્રિય

હવામાન વિભાગના રિજનલ ડાયરેક્ટર જયંત સરકારે જણાવ્યું કે, “ગુજરાતમાં અને તેની આસપાસ ત્રણ સિસ્ટમ સક્રિય થઈ છે. દક્ષિણ ગુજરાતથી ઉત્તર કેરલ સુધી અપતટીય સિસ્ટમ સક્રિય થઈ છે. ઉપરાંત દક્ષિણ ગુજરાત અને આસપાસના વિસ્તારો તેમજ કચ્છ અને તેની આસપાસના વિસ્તારોમાં અપરએર સાઈક્લોનિક સર્ક્યુલેશનની સ્થિતિ સર્જાઈ છે. જેના કારણે ઉત્તર ગુજરાતના વિસ્તારોમાં વરસાદ પડશે. કેટલાક વિસ્તારોમાં ભારે વરસાદની આગાહી પણ કરી છે. કચ્છના અમુક વિસ્તારોમાં પણ વરસાદની શક્યતા છે.”

ઉત્તર ગુજરાતમાં ભારે વરસાદની આગાહી

હવામાન વિભાગની આગાહી પ્રમાણે, આગામી 48 કલાકમાં બનાસકાંઠા, સાબરકાંઠા, પાટણ, મહેસાણા અને અરવલ્લીમાં ભારે વરસાદ પડશે. હવામાન વિભાગની વેબસાઈટ પર આપેલી માહિતી પ્રમાણે, દક્ષિણ ગુજરાતમાં હળવોથી મધ્યમ વરસાદ ચાલુ રહેશે. આગામી 48 કલાકમાં સમગ્ર ગુજરાતની સાથે કેંદ્ર શાસિત પ્રદેશો દીવ-દમણ અને દાદરા નગર હવેલીમાં વરસાદ પડવાની શક્યતા છે.

ક્યાં કેટલો વરસાદ?

મહેસૂલ વિભાગ સંચાલિત સ્ટેટ કંટ્રોલરૂમની માહિતી પ્રમાણે, કચ્છમાં 1 મિલીમીટર, ઉત્તર ગુજરાતમાં 3 મિમી, પૂર્વ-મધ્ય ગુજરાતમાં 1 મિમી, સૌરાષ્ટ્રમાં 3 મિમી અને દક્ષિણ ગુજરાતમાં 6 મિલીમીટર સરેરાશ વરસાદ નોંધાયો છે. ગરુડેશ્વરમાં 40 મિમી, કપરાડા અને બારડોલીમાં 36 મિમી અને ઉમરગામમાં 23 મિમી વરસાદ નોંધાયો છે. ગુરુવારે રાજ્યના 62 તાલુકા અને 25 જિલ્લાઓમાં વરસાદ પડ્યો.