ભાજપમાં ભાગલા! રુપાણી Vs પાટીલની છાવણીમાં વહેંચાઈ ગયો પક્ષ?

અમદાવાદ: ભાજપના નવનિયુક્ત પ્રદેશ પ્રમુખ સીઆર પાટીલ સૌરાષ્ટ્રને ખાસ્સું મહત્વ આપી રહ્યા છે. ગુજરાતમાં આ પદ પર પસંદગી પામનારા સૌ પહેલા બિન-ગુજરાતી, બિન-પાટીદાર, બિન-કાઠિયાવાડી, બિન-ઓબીસી એવા સીઆર પાટીલ 18 ઓગસ્ટથી 22 ઓગસ્ટ સુધી સૌરાષ્ટ્રના પ્રવાસે રહ્યા હતા. જે દર્શાવે છે કે પાટીલ સૌરાષ્ટ્રને કેટલું મહત્વ આપી રહ્યા છે. નવસારીના સાંસદ પાટીલની ગુજરાતના પક્ષ પ્રમુખ તરીકે વરણી સીધી પીએમ મોદીની સૂચનાથી થઈ હોવાનું પણ મનાઈ રહ્યું છે.

સૌરાષ્ટ્રના પ્રવાસ દરમિયાન પાટીલે સ્થાનિક નેતાઓ સાથે મુલાકાત કરી હતી, જેમાં તેમણે કોંગ્રેસમાંથી આવેલા પક્ષપલ્ટુઓને મહત્વ નહીં અપાય તેવી સાફ વાત કરી હતી. પાટીલના પુરોગામી જીતુ વાઘાણી અને સીએમ વિજય રુપાણીએ પાટીલના આગમન પહેલા 45 જેટલા કોંગ્રેસીઓને ભાજપમાં સામેલ કર્યા છે, અને તેમાંથી ઘણાને ટિકિટો આપી ચૂંટણી પણ જીતાડી છે. જો કે પાટીલ હવે આ ટ્રેન્ડને ચાલુ રાખવાના મૂડમાં ના હોય તેમ લાગી રહ્યું છે.

રાજકોટ કોંગ્રેસના મંત્રી વિરલ ભટ્ટનું કહેવું છે કે પાટીલનું આ નિવેદન ભાજપમાં પડી ગયેલા ભાગલાને ઉજાગર કરવાની સાથે કોંગ્રેસ છોડી ભાજપમાં સામેલ થનારાની હવે શું હાલત થશે થે પણ બતાવે છે. પાટીલે ભાજપના સૌરાષ્ટ્રના મીડિયા ઈન-ચાર્જ અને રુપાણીના વિશ્વાસુ એવા રાજુ ધ્રુવને મીડિયા સાથે વાત કરતી વખતે જાહેરમાં જ બે વાર ખખડાવી નાખ્યા હતા. જેનાથી પણ ભાજપ પાટીલ અને રુપાણી એમ બે છાવણીમાં વહેંચાઈ ગયો હોવાની ચર્ચા શરુ થઈ છે.

પાટીદાર વેપારી વિપુલ સાવલિયાનું માનીએ તો, સીઆર પાટીલ સૌરાષ્ટ્ર અને તેમાંય ખાસ કરીને પાટીદારો સાથે જોડાણ નથી ધરાવતા. હાલમાં જ રુપાણી અને પાટીલના સમર્થકો દ્વારા ટેલીગ્રામ પર બે ચેનલ્સ બનાવવામાં આવી હતી. બંનેમાં પચાસેક હજાર જેટલા મેમ્બર્સ છે. એવું લાગી રહ્યું છે કે બંને જૂથમાં વધારેને વધારે લોકોને સામેલ કરવાની હરિફાઈ ચાલુ થઈ છે. રુપાણીના ખાસ રાજુ ધ્રુવને પાટીલે ખખડાવ્યા તે મામલે ભાજપના રાજકોટના પ્રમુખ ડીકે સાખિયા જણાવે છે કે પાટીલ યોગ્ય દિશામાં આગળ વધી રહ્યા છે. જો કે સ્થાનિક સૂત્રોનું માનીએ તો સૌરાષ્ટ્રમાં ભાજપ સ્પષ્ટ રીતે પાટીલ અને રુપાણીની છાવણીમાં વહેંચાઈ ગયો છે.