એપશહેર

ગુજરાતમાં 25,000 કરોડનો દારુ વેચાય છે, આ રુપિયા કોના ખિસ્સામાં જાય છે?: મેવાણી

નવરંગ સેન | I am Gujarat 28 Dec 2017, 5:30 pm
I am Gujarat jignesh gives ultimatum of 24 hours to shut liquor dens in ahmedabad
ગુજરાતમાં 25,000 કરોડનો દારુ વેચાય છે, આ રુપિયા કોના ખિસ્સામાં જાય છે?: મેવાણી


અમદાવાદના CPને મળ્યા મેવાણી

અમદાવાદ: ધારાસભ્ય તરીકે ચૂંટાયા બાદ જિજ્ઞેશ મેવાણીએ અમદાવાદમાં દારુના વેચાણ સામે જંગ શરુ કર્યો છે. ગઈ કાલે ગોમતીપુર વિસ્તારમાં પોલીસ સ્ટેશનનો ઘેરાવ કર્યા બાદ આજે મેવાણીએ શહેરના પોલીસ કમિશનર સાથે મુલાકાત કરી હતી, અને અમદાવાદમાં ખુલ્લેઆમ વેચાતા દારુ અંગે રજૂઆત કરી હતી. મેવાણીએ દારુબંધી હોવા છતાં ગુજરાતમાં દારુનું બેફામ વેચાણ થઈ રહ્યું હોવાનો દાવો કરી કેટલાક ચોંકાવનારા દાવા પણ કર્યા છે.

વાડજમાં પોલીસ સ્ટેશન સામે દારુ વેચાય છે

મેવાણીએ જણાવ્યું હતું કે, વાડજના કેટલાક સ્થાનિક લોકોએ તેમની સમક્ષ રજૂઆત કરી હતી કે, અહીંના કેટલાક વિસ્તારોમાં દારુનું ખુલ્લેઆમ વેચાણ થાય છે. વાડજમાં તો પોલીસ સ્ટેશનની સામે જ દારુ વેચાતો હોવાનું મેવાણીએ કહ્યું હતું. મેવાણીએ જણાવ્યું હતું કે, દલિત અને ઠાકોરોની જ્યાં વસ્તી છે ત્યાં ટાર્ગેટ કરાતા હોય તેમ દારુના અડ્ડાઓ ચાલે છે.

ડીજીપી પણ આ દૂષણથી અવગત છે: મેવાણી

જિજ્ઞેશે કહ્યું હતું કે, અહીં જે પણ એસીપી, ડીસીપી આવે છે તેમને તેમજ છેક રાજ્યના પોલીસ વડા, હોમ ડિપાર્ટમેન્ટ અને હોમ સેક્રેટરી પણ આ સ્થિતિથી અવગત છે. તેમણે સવાલ કર્યો હતો કે, ગુજરાતમાં દર વર્ષે 25 હજાર કરોડનો ગેરકાયદે દારુ વેચાય છે તે રુપિયા કોના ખિસ્સામાં જાય છે?

..તો 30મીએ પોલીસ કમિશનર કચેરીનો ઘેરાવ કરીશું

મેવાણીએ પોલીસ તંત્રને ખુલ્લો પડકાર ફેંકતા કહ્યું હતું કે, 24 કલાકમાં જો દારુના અડ્ડા બંધ ન થયા તો ગુજરાતની પોલીસ એક બાજુ હશે, અને બીજી બાજુ જિજ્ઞેશ મેવાણી હશે. તેમણે એમ પણ કહ્યું કે, ગોમતીપુર પોલીસ સ્ટેશનમાં ગઈ કાલે અમે રજૂઆત કરી હતી, અને જેસીપી જેકે ભટ્ટે તાત્કાલિક પગલાં લેવાની ખાતરી આપી છે. જો 24 કલાકમાં પગલાં ન લેવાયા તો 30 તારીખે પોલીસ કમિશનરની કચેરીનો ઘેરાવ કરવામાં આવશે.
લેખક વિશે
નવરંગ સેન
નવરંગ સેન 2013થી ટાઈમ્સ ગ્રુપ સાથે સંકળાયેલા છે. ડિજિટલ જર્નાલિઝમમાં 14 વર્ષનો અનુભવ ધરાવતા નવરંગ સેને અગાઉ દિવ્ય ભાસ્કર તેમજ GSTVમાં કામ કર્યું છે. અર્થકારણ, રાજકારણ તેમજ ટેક્નોલોજી અને ઓટોમોબાઈલ તેમના રસના વિષય છે.... વધુ વાંચો

Read Next Story

Gujarati News - I am Gujarat: ગુજરાત, દેશ, વિદેશ, શિક્ષણ, બિઝનેસ, મૂવી, જ્યોતિષ, ધર્મ, સ્પોર્ટ્સના લેટેસ્ટ સમાચાર ઉપરાંત વાયરલ ન્યૂઝ મેળવવા માટે ડાઉનલોડ કરો IamGujaratની એપ
તમામ તાજી ખબરો માટે I am Gujarat ફેસબૂકપેજને લાઈક કરો