મેવાણીએ આવતીકાલે રજૂ થનારા સ્ટેચ્યુ ઓફ યુનિટી અંગેના ખરડાની નકલ સળગાવી

ગાંધીનગર: વિધાનસભા સત્રના બીજા દિવસે અપક્ષ ધારાસભ્ય જીગ્નેશ મેવાણીએ આજે વિધાનસભાની બહાર જ સ્ટેચ્યુ ઓફ યુનિટી અંગેના ખરડાની કોપી સળગાવી હતી. મેવાણીને ગઈકાલે જ અધ્યક્ષે સમગ્ર સત્ર માટે સસ્પેન્ડ કર્યા હતા. સ્ટેચ્યુ ઓફ યુનિટી બિલ આવતીકાલે વિધાનસભામાં રજૂ થવાનું છે. મેવાણીએ કહ્યું હતું કે, જો હું ગૃહમાં હોત તો બિલ ફાડી નાખ્યું હોત પરંતુ આજે હું આ બિલને સળગાવી મારો વિરોધ પ્રદર્શીત કરું છું.હવે ટેલિગ્રામ પર મેળવો દરેક મહત્વના સમાચાર, અમારી ચેનલ સબસ્ક્રાઈબ કરવા ક્લિક કરોમેવાણીએ ગુજરાતના તમામ અનુસૂચિત જાતિ અને જનજાતિ તેમજ દલિત ધારાસભ્યોને અપીલ કરી હતી કે તમામ ધારાસભ્યો સાથે મળી આ બિલનો વિરોધ કરે, અને તેની સામે પોતાનો રોષ પ્રગટ કરે. વડગામના ધારાસભ્ય મેવાણીએ કહ્યું હતું કે આ બિલ આદિવાસીઓનું નખ્ખોદ કાઢનારું છે. કોઈપણ સંજોગોમાં આ બિલ રોકાવું જોઈએ તેવી માગ કરતા મેવાણીએ જણાવ્યું હતું કે, ગુજરાતમાં આદિવાસીઓના બંધારણીય અધિકારોનું છડેચોક ઉલ્લંઘન થઈ રહ્યું છે માટે જ તેઓ બિલની કોપી સળગાવી રહ્યા છે.મેવાણીનો આક્ષેપ છે કે જો આ બિલ પસાર થઈ જશે તો આદિવાસી લોકો ધંધા-રોજગાર નહીં કરી શકે. મહત્વનું છે કે, સોમવારથી શરુ થયેલું ગુજરાત વિધાનસભાનું હાલનું સત્ર ત્રણ દિવસ ચાલવાનું છે, જો કે પહેલા જ દિવસે મેવાણીને અધ્યક્ષ દ્વારા આખાય સત્ર માટે સસ્પેન્ડ કરવામાં આવ્યા હતા. સોમવારે ગૃહમાં બંધારણ દિન ઉજવવાનો પ્રસ્તાવ મૂકવામાં આવ્યો હતો ત્યારે મેવાણીએ ભાજપ નોટંકી બંધ કરે તેવું કહેતા તેની ગંભીર નોંધ લઈ અધ્યક્ષે તેમને સસ્પેન્ડ કર્યા હતા.