સ્કૂલ LC અને GRમાં ‘વહીવટ’ બાદ મંજૂરી વગર જ સુધારા-વધારા !

નવગુજરાત સમય > અમદાવાદ

સ્કૂલમાં વિદ્યાર્થી પ્રવેશ મેળવે ત્યારે સ્કૂલના જનરલ રજિસ્ટર (GR)માં તેની એન્ટ્રી કરાય છે અને સ્કૂલ છોડતી વખતે સ્કૂલ લિવિંગ સર્ટિફિકેટ (LC) અપાય છે. આ બંને ડોક્યુમેન્ટમાં સુધારા કરવા હોય તો સ્કૂલોએ ડીઈઓ કચેરીમાંથી મંજૂરી લેવાની હોય છે અને ત્યારબાદ જ સુધારા કરી શકાય છે. પરંતુ અમદાવાદ શહેરની કેટલીક સ્કૂલો ‘વહીવટ’ કરી ડીઈઓ કચેરીની મંજૂરી વગર જ સ્કૂલ લિવિંગ સર્ટિફિકેટ અને સ્કૂલના જનરલ રજિસ્ટરમાં ફેરફાર કરી રહી છે. ઉપરાંત ઘણી સ્કૂલો પ્રવેશ આપતી વખતે યોગ્ય તકેદારી રાખતી ન હોવાના લીધે પાછળથી સુધારા કરવાની ફરજ પડતી હોવાનું પણ બહાર આવ્યું છે. આ સ્થિતિમાં જ્યારે પણ સુધારા કરવાની જરૂર પડે ત્યારે ડીઈઓ કચેરીની મંજૂરી લઈને જ સુધારો કરવામાં આવે તેવો આદેશ ડીઈઓ દ્વારા કરવામાં આવ્યો છે.

અમદાવાદ શહેરની ડીઈઓ કચેરીના ધ્યાને આવ્યું હતું કે, વિદ્યાર્થીઓને આપવામાં આવતા સ્કૂલ લિવિંગ સર્ટિફિકેટ અને શાળાના જનરલ રજિસ્ટરમાં કેટલીક સ્કૂલોના સંબંધિત કર્મચારીઓ દ્વારા ડીઈઓ કચેરીની પૂર્વ મંજૂરી વગર જ સુધારા-વધારા કરવામાં આવે છે. ખરેખર, નિયમ પ્રમાણે ડીઈઓ કચેરીના અધિકારીની પૂર્વ મંજૂરી વગર આવા સુધારા-વધારા કરી શકાતા ન હોવા છતાં સ્કૂલો બેફામ રીતે ‘વહીવટ’ કરી LC અને GRમાં સુધારા વધારા કરી આપે છે.

આટલું જ નહીં, સ્કૂલોમાં વિદ્યાર્થી પ્રવેશ મેળવે ત્યારે જરૂરી માહિતી તપાસીને જ પ્રવેશ ફાળવવાનો હોય છે, પરંતુ તેમ છતાં શાળાઓ દ્વારા જરૂરી ચકાસણી કરવામાં આવતી નથી. જેના કારણે વિદ્યાર્થીઓના નામ, અટક, જન્મતારીખ, જ્ઞાતિ, પેટાજ્ઞાતિ જેવી અત્યંત મહત્વની બાબતોમાં ગંભીર ક્ષતિઓ સર્જાય છે. આ ક્ષતિના કારણે વિદ્યાર્થીઓને કાયમી ધોરણે મુશ્કેલીઓ સહન કરવી પડે છે. આમ છતાં, હવે કોઈ સુધારા-વધારાની જરૂરિયાત ઊભી થાય તો ધોરણ-10ની બોર્ડની પરીક્ષા પહેલા જરૂરી કાર્યવાહી કરી ડીઈઓ કચેરીની મંજૂરી લઈને સુધારા વધારા કરી શકાશે.

ધોરણ-10ની પરીક્ષા આપ્યા બાદ કોઈ સુધારા-વધારા થઈ શકશે નહીં. જેથી ધોરણ-10ની પરીક્ષા બાદ કોઈ સુધારા આવે ત્યારે તેમની દરખાસ્ત ડીઈઓ કચેરી ખાતે મોકલવાના બદલે ફર્સ્ટ મેજિ. કોર્ટમાં જવાની સલાહ આપવા માટે સ્કૂલોને ડીઈઓએ સૂચના આપી છે. ઉપરાંત કોર્ટની સુધારા દરખાસ્ત બાદ ડીઈઓ કચેરીની મંજૂરી મેળવી શાળાએ નક્કી કરેલા નમૂનામાં પ્રમાણપત્ર આપવાનું રહેશે.