અ'વાદઃ યુવતી ફોન ન ઉપાડતા પ્રેમીએ રિવરફ્રન્ટ પર લાફા ઝીંક્યા, પોલીસ સુધી પહોંચ્યો મામલો

અમદાવાદમાં સાબરમતી નદીના કિનારે તૈયાર કરવામાં આવેલા રિવરફ્રન્ટ પર મોટી સંખ્યામાં પ્રેમી કપલ રોજે રોજ જોવા મળતા હોય છે. શહેરની ભાગદોડથી દૂર પ્રેમી યુગલો અહીં સાથે બેસીને ટાઈમ પસાર કરતા દેખાય છે અને ઘણીવાર અહીં પ્રેમી યુગલો વચ્ચે તકરાર થવાના કિસ્સાઓ પણ સામે આવી ચૂક્યા છે. એવામાં ફરી એકવાર રિવરફ્રન્ટ પર બેંકમાં નોકરી કરતા એક પ્રેમી અને પ્રેમિકા વચ્ચે તકરાર થવાની ઘટના બની હતી અને મામલો છેક પોલીસ સુધી પહોંચી ગયો છે.

શહેરના શાહીબાગ વિસ્તારમાં રહેતી અને નરોડાની એક બેંકમાં ક્લાર્ક તરીકે ફરજ બજાવતી યુવતીએ તેના પ્રેમી વિરુદ્ધ રિવરફ્રન્ટ પોલીસ સ્ટેશનમાં ફરિયાદ નોંધાવી છે. યુવતીનો પ્રેમી મેમ્કો ખાતે આવેલી SBIની બ્રાન્ચમાં નોકરી કરે છે અને બંને થોડા સમય પહેલાં જ એકબીજાના પ્રેમમાં પડ્યા હતા. યુવતી જ્યારે ઘરે જતી ત્યારે પ્રેમી બાઈક પર લેવા આવતો હતો બંને જણા બાઈક પર બેસી રિવરફ્રન્ટ ખાતે બેસવા આવ્યા હતા.

યુવક અને યુવતી રિવરફ્રન્ટ ગાર્ડન સામે આવેલા પાર્કિંગમાં ખુલ્લી જગ્યામાં બેઠા હતા આ દરમિયાન બંને વચ્ચે ઝઘડો થઈ ગયો. યુવતીએ પ્રેમીને કહ્યું કે, તે તેની સાથે પ્રેમ સંબંધ રાખવા માગતી નથી. તે છેલ્લા પંદર જેટલા દિવસોથી પ્રેમીનો ફોન પણ ઉપાડતી નહોતી. જેથી પ્રેમીએ આવેશમાં આવીને પ્રેમિકાને બોલવા લાગ્યો. દરમિયાન બંનેની એકબીજા સાથે બોલાચાલી ઉગ્ર થઈ ગઈ હતી. જેના કારણે ઉશ્કેરાયેલા પ્રેમીએ યુવતીને ગાલ લાફા ઝીંકી દીધા હતા. આ સાથે જ પ્રેમીએ ધમકી પણ આપી કે જો તે તેની સાથે પ્રેમસંબંધ નહીં રાખે તેને જાનથી મારી નાખશે.

આ બાદમાં યુવતીને બાઈક પર બેસાડીને પ્રેમી તેને ઘરે ઉતારી ગયો હતો. બાદમાં યુવતીએ પ્રેમી બળજબરીથી પ્રેમ સંબંધ રાખવા માટે દબાણ કરીને ધમકી આપતો હોવાની ફરિયાદ પોલીસ કમિશનરની કચેરી ખાતે નોંધાવી હતી. અહીંથી પોલીસ દ્વારા ફરિયાદને રિવરફ્રન્ટ ઈસ્ટ પોલીસ સ્ટેશન ખાતે ટ્રાન્સફર કરવામાં આવી હતી. હાલમાં પોલીસે પ્રેમી વિરુદ્ધ ગુનો નોંધી વધુ તપાસ હાથ ધરી છે.