અમદાવાદ નજીક કરોડોના લક્ઝરી બંગલો ખરીદનારા ભરાઈ ગયાઃ છેક એક દાયકા પછી મળી મોટી રાહત

અમદાવાદ નજીક સનાથલ અને તેલાવ ગામ વચ્ચે 3380 યુનિટની એક લક્ઝરી બંગલો સ્કીમને છેક એક દાયકા પછી બીયુ પરમિશન અપાય તેવી શક્યતા છે. સ્ટેટ અર્બન ડેવલપમેન્ટ ડિપાર્ટમેન્ટની સ્પેશિયલ ઈન્કવાયરી કમિટીએ આ સ્કીમ માટેના બંધનો દૂર કરીને તેને માન્યતા આપી છે. ઇન્કવાયરી કમિટીએ એ બાબતની તપાસ કરવાની હતી કે ગોકુલધામ સ્કીમમાં વ્યક્તિગત બંગલોને બિલ્ડિંગ યુઝ પરમિશન આપવામાં તથા પ્લાનને મંજૂર કરવામાં કોઈ ગોટાળો થયો હતો કે નહીં. આ ઉપરાંત 50 હેક્ટરના પ્લોટમાંથી 40 ટકા જમીન કપાત કરવાની છૂટછાટ માન્ય ગણાય કે નહીં.

ગોકુલધામ લક્ઝરી બંગલો સ્કીમ પાંચ લાખ ચોરસ મીટર અથવા 50 હેક્ટરમાં પથરાયેલી છે અને લગભગ 2000 કરોડની માર્કેટ વેલ્યૂ ધરાવે છે. ઇન્કવાયરી કમિટી પાસેથી લીલી ઝંડી મળ્યા પછી ઔડા આ એરિયા માટે સ્પેશિયલ ટાઉનપ્લાનિંગ સ્કીમ મુકશે અને આ વિસ્તારમાં પ્રોપર્ટીના માલિકોને સિવિક સુવિધાઓ મળશે. 13 એપ્રિલ 2022ના રોજ આ ઇન્કવાયરી રિપોર્ટ તૈયાર કરાયો હતો. 22 ઓગસ્ટે તે ઔડાના બોર્ડ સમક્ષ મુકાયો હતો. આ સ્કીમ 70 અને 80A સબપ્લોટ વચ્ચે આવેલી છે.

50 હેક્ટરની સ્કીમને ફરજિયાત 40 ટકા જમીન કપાતના નિયમમાંથી મંજૂરી શા માટે આપવામાં આવી તે અંગે સ્થાનિક ધારાસભ્યે વાંધો ઉઠાવ્યા પછી માર્ચ 2014થી ઔડાએ બીયુ પરમિશન આપવાનું બંધ કરી દીધું હતું. ત્યાર બાદ નવેમ્બર 2019માં આ અંગે કમિટીની રચના કરાઈ હતી.

29 એપ્રિલ 2006ના રોજ જીડીસીઆરના એક એક્ઝમ્પશન રુલ હેઠળ સ્કીમને સૌથી પહેલાં માન્યતા અપાઈ હતી. આ નિયમ પ્રમાણે સબ-પ્લોટિંગના કેસમાં આ સબ-પ્લોટ પર બની રહેલા બિલ્ડિંગ યુનિટ્સ 1000 ચોરસ મીટરથી નાના હોવા જોઈએ, બિલ્ડિંગની ઉંચાઈ 7 મીટરથી વધારે હોવી ન જોઈએ અને કોઈ પણ ફ્લોરનો મહત્તમ બિલ્ટ અપ એરિયા પ્લોટ એરિયાના 20 ટકાથી વધારે હોવો ન જોઈએ. આ સ્કીમ રેસિડેન્શિયલ R2 ઝોનમાં આવેલ છે. સામાન્ય સંજોગોમાં GDCR-2002 પ્રમાણે R2 ઝોનમાં 45 ટકા ગ્રાઉન્ડ કવરેજની જરૂર હોય છે અને 1.2ની FSI મળે છે. બિલ્ડિંગની ઉંચાઈ વધુમાં વધુ 10 મીટર રરાખી શકાય છે. 13 એપ્રિલે ઇન્કવાયરી કમિટીએ ઔડા દ્વારા અપાયેલી ડેવલપમેન્ટ પરમિશનને માન્ય રાખીન જણાવ્યું કે આ છૂટછાટ જીડીસીઆર-2002ની જોગવાઈઓને અનુરૂપ છે અને 40 ટકા કપાતનો કોઈ સવાલ નથી.