યુનિ.માં ‘M.N. પ્રિય સિન્ડિકેટ સભ્યો’ને સરકાર પ્રિય થાય તેવા કામો કરવા ટકોર

નવગુજરાત સમય > અમદાવાદ

– ગુજરાત યુનિવર્સિટીમાં આજે જુદા જુદા ૬૦ કરોડ રૂપિયાના પ્રોજેક્ટનું ભૂમિ પૂજન ઉચ્ચ અને ટેકનિકલ રાજયમંત્રી વસુબેન ત્રિવેદીના હસ્તે કરાયું હતું. આ પ્રસંગે ઇએમઆરસી દ્વારા ખાસ કુલપતિ માટે તૈયાર કરાયેલી સીડી દર્શાવાઈ હતી. આ સીડીમાં સેનેટ અને સિન્ડિકેટ સભ્યો જે રીતે કુલપતિની વાહ વાહ કરતાં હતા તે જોઇને મંત્રીએ તમામ સભ્યોને કુલપતિના પ્રિયની જેમ સરકારને પણ લોકપ્રિય કરવા માટે પ્રયાસો કરવા જણાવ્યું હતું. યુનિવર્સિટીમાં વૈજ્ઞાનિક અને મિસાઇલમેન ડો.અબ્દુલ કલામના નામે સાયન્સ એન્ડ રિસર્ચ માટે ખાસ ભવન નિર્માણ કરવાનું નક્કી કરાયું છે. આ માટે રાજય સરકાર અને કેન્દ્ર સરકાર દ્વારા ખાસ અનુદાન અપાયું હતું. આ સિવાય સ્પોર્ટસ કોમ્પ્લેક્સ, એમએસડબલ્યુ સહિતના જુદા જુદા ૬૦ કરોડના કામોનું ભૂમિપૂજનનો કાર્યક્રમ ગુરુવારે યોજાયો હતો. જેમાં ઉપસ્થિત રહેલા મંત્રી વસુબેન ત્રિવેદીએ યુનિવર્સિટીમાં સેનેટ અને સિન્ડિકેટની ચૂંટણીના બદલે સમરસતાથી થયેલી નિયુક્તિની આવકારી હતી. આ ઉપરાંત પોતે પણ પી.જી. ગુજરાત યુનિવર્સિટીમાંથી કર્યું હોવાથી યુનિવર્સિટીના રાજકારણથી પરિચિત હોવાનો નિર્દેશ પણ કર્યો હતો. આ સમારંભમાં ઇએમઆરસીએ કુલપતિના જુદા જુદા કાર્યોને આવરી લેતી તૈયાર કરેલી સીડી મંત્રી સહિત ઉપસ્થિત લોકોને દર્શાવાઈ હતી. આ સીડીમાં જુદા જુદા સિન્ડિકેટ સભ્યો દ્વારા કુલપતિ એમ.એન.પટેલ દ્વારા કરાયેલા કામોની પ્રશંસા કરાઈ હતી. આ સીડી જોઇને વસુબેને એવી ટકોર કરી કે, સિન્ડિકેટ સભ્યો એમ.એન. પટેલ (કુલપતિ) પ્રિય થયા તે સારું છે પરંતુ સરકાર પ્રિય થાય તેવા કામો પણ કરવા જોઇએ. મંત્રીશ્રીની આ પ્રકારની ટકોરના કારણે ભારે રમૂજ પણ ફેલાઇ હતી. કેટલાક સભ્યોએ એવો પણ અર્થ કાઢયો હતો કે, માત્ર વાહ વાહ કરવા કરતાં ખરેખર સારા કામો થાય તેવા પ્રયાસો કરવા માટે બહેને ટકોર કરી હતી. જો કે, આજે મંત્રી દ્વારા યુનિવર્સિટીએ ઓનલાઇન એડમિશન સહિતના અપનાવેલા નવા અભિગમોની પ્રશંસા પણ કરાઈ હતી.