નકલી વિઝા પર અમેરિકા જતું મહેસાણાનું પાટીદાર દંપતી ઝડપાયું

અમેરિકામાં સેટલ થઈને ડોલરમાં કમાણી કરવાનું સપનું તો મોટાભાગની વ્યક્તિઓનું હશે. દરવર્ષે ગ્રીન કાર્ડ કે વિઝા લેવા માટે મોટી સંખ્યામાં ભારતીયો તેમાં પણ ખાસ કરીને ગુજરાતીઓ એપ્લાય કરતા હોય છે, પરંતુ તમામ લોકોને તેમાં સફળતા મળતી નથી. એવામાં પોતાનું અમેરિકા જવાનું સપનું પૂરું માટે વ્યક્તિ સાચો-ખોટો કોઈપણ રસ્તો અપનાવવા માટે તૈયાર થઈ જતી હોય છે. એવામાં હવે નકલી વિઝાના આધારે એમેરિકા જવાની તકમાં રહેલા દંપતી અને ત્રણ લોકોની એસ.ઓ.જી દ્વારા ધરપકડ કરવામાં આવી છે.

જાણકારી મુજબ, મૂળ મહેસાણાના રહેવાસી દંપતી રાજેશ પટેલ અને સોનલ પટેલ અમદાવાદ આવ્યા હતા અને અહીંથી તેઓ યુ.એસ.એ જવા નીકળવાના હતા. જોકે તેમની પાસે મળી આવેલા વિઝા નકલી હોવાનું સામે આવતા એસ.ઓ.જી દ્વારા બંનેની ધરપકડ કરવામાં આવી છે.

આ દંપતી1મી ડિસેમ્બરના રોજ અમદાવાદથી અમેરિકા જવા નીકળી રહ્યા હતાં ત્યારે એરપોર્ટ પર ઇમિગ્રશન દ્વારા તપાસ કરતા તેમના વિઝા નકલી હોવાનું જાણવા મળ્યું હતું, જેથી બંનેને પકડી પોલીસને સોંપવામાં આવ્યા હતા. જે બાદ પોલીસે તેમની ધરપકડ કરીને તપાસ કરતા માલુમ પડ્યું કે વિશ્વજીત પટેલ નામના એક એજન્ટે તેમને આ નકલી વિઝા બનાવી આપ્યા હતા.

પોલીસની તપાસમાં વધુ કેટલીક ચોંકાવનારી બાબતો સામે આવી હતી. જે મુજબ આરોપી વિશ્વજીત પટેલે આ દંપતી પાસેથી 10 લાખમાં નકલી વિઝાની વાત કરી હતી અને બંને અમેરિકા પહોંચી જાય ત્યારબાદ 1.20 કરોડ તેમની પાસેથી એજેન્ટને લેવાના હતા. આટલું જ નહીં બંનેની ટિકિટના રૂપિયા પણ હાલમાં એજન્ટ વિશ્વજીતે જ આપ્યા હોવાનું પણ સામે આવી રહ્યું છે. જોકે દંપતી અમેરિકા માટે ફ્લાઈટમાં બેસે તે પહેલા જ પકડાઈ ગયું હતું. પોલીસ એ પણ તપાસ કરી રહી છે કે વિશ્વજીતે આ સિવાય અન્ય કોઈ લોકોને આવી રીતે વિદેશ મોકલ્યા છે કે કેમ.