ગાંધીનગર: સેક્ટર-11માં સાઈકલ પર નોકરીએ જઈ રહેલા યુવકની ગોળી મારીને હત્યા

ગાંધીનગર: પાટનગરમાં ફાયરિંગની ઘટના સામે આવતા ચકચાર મચી ગઈ છે. પ્રાપ્ત માહિતી અનુસાર સેક્ટર-11માં સાઈકલ પર નોકરીએ જઈ રહેલા એક 35 વર્ષીય યુવકની ગોળી મારીને હત્યા કરી દેવામાં આવતા આસપાસના વિસ્તારમાં ગભરાટ ફેલાઈ ગયો છે. સૂત્રો પાસેથી પ્રાપ્ત માહિતી અનુસાર બાઈક પર આવેલા બે શખ્સોએ આ હત્યાકાંડને અંજામ આપ્યો છે. બનાવની જાણ થતાં પોલીસ કાફલો ઘટનાસ્થળે પહોંચ્યો હતો અને લાશને કબજે લઈને પોસ્ટમોર્ટમ માટે સરકારી હોસ્પિટલ ખસેડીને અજ્ઞાત હુમલાખોરોની તપાસ હાથ ધરી હતી. બનાવને પગલે રોડ પર મોટી સંખ્યામાં લોકોની ભીડ એકઠી થઈ હતી.

બાઈક પર આવેલા બે શખ્સો ગોળી મારીને ફરાર
મીડિયા રિપોર્ટ અનુસાર મૃતકની ઓળખ કિરણ ઠાકોર તરીકે થઈ છે. જે ગાંધીનગરના ઈંદ્રોડાના ગામમાં રહે છે અને તેના પરિવારમાં પરિવારમાં પત્ની અને બે સંતાનો છે. કિરણ સચિવાલય ખાતે રોજમદાર તરીકે નોકરી કરતો હતો. સવારના સમયે કિરણ નોકરીએ જવા માટે સાઈકલ લઈને નીકળ્યો હતો. દરમિયાન સેક્ટર-11માં બાઇક ઉપર આવેલા બે અજાણ્યા શખ્સોએ કિરણનો પીછો કર્યો અને તક મળતા જ ફાયરિંગ કરીને ભાગી ગયા હતા.

મૃતક સચિવાલયમાં રોજમદાર તરીકે કામ કરતો હતો!
સૂત્રો પાસેથી પ્રાપ્ત માહિતી અનુસાર કિરણ સચિવાલય ગૃહ વિભાગમાં રોજમદાર તરીકે છેલ્લા 13 વર્ષથી નોકરી કરતો હતો. 9MMની ગોળીથી કિરણની હત્યા કરવામાં આવી હોવાનું પ્રાથમિક તપાસમાં જાણવા મળ્યું છે. બનાવને પગલે ડોગ સ્કવોર્ડ, ફિંગર પ્રિન્ટ એક્સપર્ટ સહિતની ટીમો દ્વારા વધુ તપાસ કરવામાં આવી રહી છે.

સુરતમાં અંગત અદાવતમાં હત્યાનો બનાવશહેરના ડિંડોલીમાં બે યુવાનોએ જાહેરમાં એક યુવક પર તીક્ષ્ણ હથિયાર વડે ઘા ઝીંકી એક યુવકે મોતને ઘાટ ઉતારી દીધો. જ્યારે અન્ય યુવક પર તેની સાથે હોવાની શંકા રાખી તેની પર પણ જીવલેણ હુમલો કરવામાં આવ્યો હતો. જોકે લોકો ભેગા થઈ જતા તે યુવકનો જીવ બચી ગયો હતો. સમગ્ર મામલે ડિંડોલી પોલીસ દ્વારા હત્યાનો ગુનો નોંધીને તપાસ હાથ ધરવામા આવી છે.