મેડિકલના તમામ વિદ્યાર્થીઓએ ફરજિયાતપણે કોવિડ-19ની ડ્યૂટીમાં જોડાવાનું રહેશે

અમદાવાદ: સરકાર સંચાલિત મેડિકલ અને પેરામેડિકલ કોલેજો તેમજ ગુજરાત મેડિકલ એજ્યુકેશન રિસર્ચ (GMERS) સંલગ્ન મેડિકલ કોલેજના તમામ વિદ્યાર્થીઓને કોવિડ-19ની ડ્યૂટી ફરજિયાત આપવાનો પરિપત્ર રાજ્ય સરકારે હાલમાં જ બહાર પાડ્યો છે. બીજા વર્ષ કે તેનાથી વધુના વિદ્યાર્થીઓને કોવિડ-19ની ડ્યૂટી બજાવવાની રહેશે. ઉપરાંત ફિલ્ડ સર્વેલન્સ અને સુપરવિઝન, ઈન્ફેક્શન રોકવું અને નિયંત્રિત કરવું, સાઈકો-સોશિયલ કેર, દર્દીઓની દેખરેખમાં મદદ તેમજ હોમ આઈસોલેશનમાં રહેલા દર્દીઓનું ધ્યાન રાખવાની કામગીરી પણ કરવી પડશે.

આ પરિપત્રમાં ગ્રેજ્યુએશન કરી રહેલા મેડિકલ અને પેરામેડિકલના પ્રથમ વર્ષના વિદ્યાર્થીઓને બાકાત રાખવામાં આવ્યા છે. ઉલ્લેખનીય છે કે, રાજ્ય સરકારે 17 જુલાઈના રોજ સરકારી ઠરાવ પસાર કર્યો હતો. જેમાં મેડિકલ, ડેન્ટલ અને પેરામેડિકલ કોર્સના તમામ વિદ્યાર્થીઓને ફરજ પર હાજર રાખવા જેથી કોરોના મહામારીની સ્થિતિ સંભાળવામાં મદદ મળે, તેવો ઉલ્લેખ હતો.

આરોગ્ય કમિશનર જયપ્રકાશ શિવહરેએ કહ્યું, કોરોના મહામારી સામે લડવા માટે રાજ્યમાં ફ્રંટલાઈન મેડિકલ ટીમની અછત વર્તાઈ રહી છે. આ પરિપત્રનો ઉદ્દેશ મેડિકલ અને પેરામેડિકલના અંડરગ્રેજ્યુએટ વિદ્યાર્થીઓની મદદથી વધારાની ફ્રંટલાઈન ટાસ્ક ફોર્સ તૈયાર કરવાનો છે. ગુજરાત સરકારના આરોગ્ય અને કલ્યાણ વિભાગ દ્વારા જુલાઈમાં જાહેરનામું બહાર પાડવામાં આવ્યું હતું. જેમાં MBBS, BDS, ફિઝિયોથેરાપી, BSc નર્સિંગ, BHMS, BAMS અને વિવિધ શાખાઓના મેડિકલ અને પેરામેડિકલ કોર્સમાં અભ્યાસ કરતા વિદ્યાર્થીઓએ ફિલ્ડમાં જતાં પહેલા ટ્રેનિંગ પ્રોગ્રામમાં ભાગ લેવાનો રહેશે તેવો ઉલ્લેખ હતો.

અમદાવાદ મ્યુનિસિપલ કોર્પોરેશન સંચાલિત NHL મ્યુનિસિપલ મેડિકલ કોલેજ અને AMC-MET મેડિકલ કોલેજના 132 વિદ્યાર્થીઓએ 17 જુલાઈના સરકારી ઠરાવ સામે ગુજરાત હાઈકોર્ટમાં વાંધો ઉઠાવ્યો હતો. અમદાવાદ સ્થિત બંને કોલેજોના MBBSના વિદ્યાર્થીઓએ કોવિડ-19ની ફરજમાં જોડાવ અથવા પરિણામ ભોગવવા તૈયાર રહો તેવા ડીનના પરિપત્રનો વિરોધ કર્યો હતો. જો કે, કોર્ટે વિદ્યાર્થીઓની અરજી ફગાવી દીધી હતી. કોર્ટે વિદ્યાર્થીઓને ડ્યૂટીમાં જોડાવવાની સલાહ આપી સાથે જ કહ્યું કે, આ તેમના માટે ઐતિહાસિક તક બનીને રહેશે.

રાજ્ય સરકારે કોર્ટમાં રજૂઆત કરી હતી કે, મેડિકલ સેવામાં મદદ મેળવવામાં મુશ્કેલી નડી રહી છે. ત્યારે મેડિકલ અને પેરામેડિકલના વિદ્યાર્થીઓને આ કામગીરીમાં જોડવા સિવાય બીજો કોઈ વિકલ્પ બચ્યો નહોતો. સૂત્રોનું માનીએ તો, રાજ્ય સરકારના તાજા પરિપત્ર મુજબ, 1 લાખ અંડરગ્રેજ્યુએટ વિદ્યાર્થીઓને એડિશનલ ટાસ્ક ફોર્સમાં જોડશે.

આરોગ્ય કમિશનર જયપ્રકાશ શિવહરેએ કહ્યું, "કોવિડ-19 ડ્યૂટી વિદ્યાર્થીઓની ટ્રેનિંગનો ભાગ હશે. આનાથી મેડિકલ અને પેરામેડિકલના વિદ્યાર્થીઓને ઘણું શીખવા મળશે. કોવિડ-19ના સંકટ સામે લડવા માટે અમારે વધુ માનવબળની જરૂર છે. હાઈકોર્ટે પણ મેડિકલના વિદ્યાર્થીઓને કહ્યું છે કે, આ તેમની ફરજનો ભાગ છે. ગ્રામ્ય વિસ્તારો સહિત દરેક જગ્યાએ મેડિકલની તમામ સુવિધાઓને ધબકતી રાખવા માટે અમારે જેટલા સંસાધનો છે તમામને ઉપયોગમાં લેવા પડશે."

પરિપત્ર અંગે બી.જે. મેડિકલ કોલેજના ડીન ડૉ. પ્રણય શાહે કહ્યું, "અમને પરિપત્ર મળી ગયો છે. હાલ તો કોલેજમાં 24 સપ્ટેમ્બર સુધીનું વેકેશન છે. પરંતુ અમે જલદી જ વિદ્યાર્થીઓને આ અંગે જાણ કરી દઈશું. અમે MBBSના વિદ્યાર્થીઓની 40-50 ટીમ બનાવીશું, જેથી જ્યારે અને જ્યાં પણ તેમની જરૂર હોય ત્યાં મોકલી શકાય." NHL મેડિકલ કોલેજના ડીન ડૉ. પ્રતિક પટેલે કહ્યું, "બીજા વર્ષ અને તેનાથી ઉપરના 1000થી વધુ વિદ્યાર્થીઓ કોવિડ-19ની ડ્યૂટીમાં જોડાઈ ગયા છે. અત્યાર સુધી લોકો સારવાર માટે હોસ્પિટલ આવતા હતા પરંતુ હવે અમે દર્દીઓના ઘર સુધી પહોંચી રહ્યા છીએ." બી.જે. મેડિકલ કોલેજના ઈન્ટર્ન ડૉ. જૈનિશ દેસાઈએ કહ્યું, "મેડિકલના વિદ્યાર્થીઓને પૂરતી તાલીમ આપવી જરૂરી છે નહીં તો તેઓ સરળતાથી સંક્રમિત થઈ શકે છે. આ પ્રકારની સેવા જરૂરી છે અને માનવતાના ધોરણે પણ તે કરવી જ જોઈએ."