ગીતા મંદિર એસટી સ્ટેન્ડ નીચેથી ખોદકામ દરમિયાન મળ્યું મરાઠાકાળનું પ્રાચીન બાંધકામ

સોમવારે ગીતા મંદિર પાસે GSRTC બસ ડેપો માટેની કન્સ્ટ્રક્શન સાઈટ પર ખોદકામ કરતી વખતે ભૂમિગત માળખું મળી આવ્યું હતું. આ ભૂમિગત માળખાની પ્રાચીનતા અને ઉપયોગિતા વિશે વધારે માહિતી મળી નથી, પરંતુ નિષ્ણાતોનું કહેવું છે કે, આ શહેરમાં મરાઠા સમયગાળા દરમિયાનની (1715-1818) અથવા તે પછીના સમયની પાણીની ભૂગર્ભ ટાંકી હોઈ શકે છે.



અમદાવાદ વર્લ્ડ હેરિટેજ સિટી ટ્રસ્ટ (AWHCT)ના ડિરેક્ટર આશિષ ત્રાંબડીયાએ કહ્યું કે, તેમણે સોમવારે સાઈટની મુલાકાત લીધી હતી. 'ટીમે દસ્તાવેજીકરણ અને માપન શરુ કર્યું હોવાથી આ બાંધકામની આકરણી હજુ ચાલુ છે. અમે કન્સ્ટ્રક્શન કંપનીને જ્યાં સુધી આકરણીનું કામ ન પતે ત્યાં સુધી અહીંયા કોઈ કામ ન કરવા જણાવ્યું છે', તેમ તેમણે કહ્યું હતું.



શહેરના હેરિટેજ સેલના સૂત્રોના જણાવ્યા પ્રમાણે, ટીમને મળી આવેલા બાંધકામની ડિઝાઈન અને રચના, હજુ પણ પોળના મકોનામાં જોવા મળતી પાણીની ભૂગર્ભ ટાંકી જેવી છે. તેની દિવાલ પર પગથિયાની કોતરણી પણ કરવામાં આવેલી છે.

'તે એક દસ્તાવેજી હકીકત છે કે જે જગ્યાએ બાંધકામ ચાલી રહ્યું છે તેનો ઉપયોગ સરઈ (વિશ્રામ ગૃહ) તરીકે થતો હતો અને બાદમાં બ્રિટિશ કાળ દરમિયાન આ જગ્યા રક્તપિત્ત તેમજ અન્ય કેટલીક બીમારીઓ ધરાવતા વ્યક્તિઓ માટે આશ્રય તરીકે ઉપયોગમાં લેવાતી હતી', તેમ એક અધિકારીએ જણાવ્યું હતું. તેમણે ઉમેર્યું હતું કે, બાંધકામમાં એવી કોઈ ચિન્હિત વિશેષતાઓ નથી કે જે સમયગાળાના તાત્કાલિક વર્ગીકરણમાં મદદ કરી શકે. 'પરંતુ શક્ય છે કે તે દરવાજા અને દિવાલોના સમયની હોય, કે જે એક સમયે પરિસરની ચારેબાજુ હતી'.



ચાલી રહેલો પ્રોજેક્ટ ત્યારે વિવાદમાં આવ્યો હતો જ્યારે ડિસેમ્બર 2019માં બિલ્ડિંગના કોન્ટ્રાક્ટરે બાંધકામ સ્થળ પર રહેલો વર્ષો જૂનો હેરિટેજ દરવાજો અને તેની આજુબાજુની દિવાલ તોડી પાડી હતી.

કાર્યકરોએ ડિમોલિશન પર વાંધો ઉઠાવ્યો હતો અને તેવી દલીલ કરી હતી કે, ભારતના પહેલા UNESCO વર્લ્ડ હેરિટેજ સિટીના બસ ડેપોને પ્રદર્શિત કરવા માટે ચાલી રહેલા પ્રોજેક્ટમાં સુંદર રીતે એકીકૃત કરી શકાયું હોત.