માસ્ક વિનાં દેખાયાં અમદાવાદનાં મેયર, પબ્લિકે પૂછ્યું આમને રુ. 200નો દંડ થશે કે નહીં?

I am Gujarat

અમદાવાદનાં પ્રથમ નાગરિકે કર્યો કાયદાનો ભંગ

અમદાવાદ: કોરોનાને કાબૂમાં લેવા માટે સરકારે જે લોકો માસ્ક પહેર્યા વિના બહાર નીકળે તેમની પાસેથી 200 રુપિયા દંડ વસૂલવાનો કાયદો બનાવ્યો છે. જોકે, એમ લાગી રહ્યું છે કે આ કાયદો માત્ર સામાન્ય નાગરિકો માટે જ છે. ખુદ અમદાવાદના મેયર બિજલ પટેલ જ આ કાયદાની ઐસી કી તૈસી કરીને ગઈકાલે જાહેરમાં માસ્ક વિના જ ફોટા પડાવતા જોવા મળ્યા હતા.

AMCના ટ્વીટર, ફેસબુક પર માસ્ક વિનાના મેયરના ફોટા

નવાઈની વાત એ છે કે, માસ્ક વિનાના મેયરના ફોટા મ્યુનિસિપલ કોર્પોરેશનના જ સત્તાવાર ફેસબુક પેજ પર મૂકવામાં આવ્યા છે. જેમાં લોકોએ મેયર મેડમ તમારું માસ્ક ક્યાં છે તેવા સવાલો પૂછ્યા છે. આ કાર્યક્રમમાં સિનિયર IAS અધિકારી ડૉ. રાજીવ ગુપ્તા અને અમદાવાદના મ્યુ. કમિશનર મુકેશ કુમાર પણ હાજર હતા. જોકે, કાયદાનું પાલન કરતા આ બંને અધિકારીઓએ માસ્ક પહેર્યા હતા.

મેયરને 200 રુપિયાનો દંડ કરવા માગ

કોર્પોરેશનના સત્તાવાર ટ્વીટર હેન્ડલ પર પણ આ ફોટોગ્રાફ્સ મૂકવામાં આવ્યા છે. જેમાં લોકોએ માસ્ક ના પહેરવા બદલ મેયર બિજલ પટેલની ઝાટકણી કાઢી છે. ઘણા યુઝર્સે તો સવાલ પણ કર્યા છે કે માસ્ક વગર બહાર નીકળેલા મેયર પાસેથી કોર્પોરેશન દંડ લેશે કે નહીં? એક યુઝરે તો એવું લખ્યું છે કે મેયરે મેંગો ફેસ્ટિવલમાં જઈ એટલી રોગપ્રતિકારક શક્તિ પ્રાપ્ત કરી લીધી છે કે હવે તેમને કોરોનાથી બચવા માસ્ક પહેરવાની જરુર નથી. કેટલાકે મ્યુ. કમિશનરને ટેગ કરી મેયર પાસેથી દંડ વસૂલવાની પણ માગ કરી છે.

સતત વિવાદમાં રહેતા મેયર

ઉલ્લેખનીય છે કે, અમદાવાદમાં ગુજરાતના 65 ટકા જેટલા કોરોનાના પોઝિટિવ કેસો છે. આ અઠવાડીયે શહેરમાં શરુ થયેલા મેંગો ફેસ્ટિવલમાં આવેલા બિજલ પટેલ ‘કોરોના વિશે કશુંય નહીં કહું, મેંગો ફેસ્ટિવલ વિશે પૂછવું હોય તો પૂછો’ તેમ કહીને મીડિયાના સવાલોના જવાબ આપવાના બદલે ચાલતી પકડી હતી.

બિજલ પટેલ સામેથી દંડ ભરશે?

થોડા દિવસ પહેલા રાજકોટમાં ભાજપના એક ધારાસભ્ય જાહેરમાં થૂંકતા કેમેરામાં ઝડપાયા હતા અને તેમણે પોતાની ભૂલ સ્વીકારી 500 રુપિયાનો દંડ ભર્યો હતો. હવે જોવાનું એ રહે છે કે બિજલ પટેલ માસ્ક ના પહેરવા બદલ સામેથી 200 રુપિયાનો દંડ ભરે છે કે નહીં.