એમ.ફીલ -પીએચડીની એન્ટ્રન્સ ટેસ્ટમાં તમામ પ્રશ્નો MCQ પ્રકારના રહેશે

નવગુજરાત સમય > અમદાવાદ

– ગુજરાત યુનિવર્સિટી દ્વારા એમ.ફીલ-પીએચડીમાં પ્રવેશ માટે છેલ્લા કેટલાય દિવસથી ઓનલાઇન રજિસ્ટ્રેશન પ્રક્રિયા શરૂ કરવામાં આવી હતી. જેમાં એમ.ફીલમાં ૨૫૦ બેઠકો માટે અંદાજે ૧૬૦૦ અને પીએચડીની ૧૮૪ બેઠકો માટે અંદાજે ૮૦૦થી વધારે વિદ્યાર્થીઓએ ફોર્મ ભર્યા હતા. વિદ્યાર્થીઓે કરેલા રજિસ્ટ્રેશનના આધારે હવે આગામી તા.૨૧મીએ પ્રવેશ પરીક્ષા લેવામાં આવશે. પ્રથમ વખત પ્રવેશ પરીક્ષામાં મહત્વના ફેરફારો કરવામાં આવ્યા છે. અગાઉ સબ્જેક્ટિવ પ્રશ્નોના આધારે પરીક્ષા લેવામાં આવતી હતી. પહેલી વખત તમામ પ્રશ્નો એમસીક્યુ પ્રકારે પુછવાનું નક્કી કરાયું છે. આ પ્રવેશ પરીક્ષાના આધારે આગામી તા.૫ થી ૧૦ ઓગસ્ટ સુધીમાં તમામ વિદ્યાર્થીઓને પ્રવેશની ફાળવણી કરી દેવાનું નક્કી કરાયું છે. પીએચડી-એમ.ફીલમાં પ્રવેશ માટે છેલ્લા કેટલાક વર્ષથી એન્ટ્રન્સ ટેસ્ટ દાખલ કરી દેવાઈ છે. ભૂતકાળમાં પીએચડીમાં મેરિટના બદલે લાગવગ સહિતના પાસાઓને વધારે મહત્વ આપવામાં આવતું હતું. જેના કારણે હોશિયાર અને લાયક વિદ્યાર્થીઓ પીએચડીમાં પ્રવેશથી વંચિત રહી જતાં હતા. આ પરિસ્થિતિ દૂર કરવા માટે એન્ટ્રન્સ ટેસ્ટ દાખલ કરી દેવાઈ હતી. ચાલુ વર્ષે વિદ્યાર્થીઓને ઓનલાઇન રજિસ્ટ્રેશન કરવા માટે અગાઉ તા.૧૧મીની મુદત અપાઈ હતી. ત્યારબાદ ૧૩ અને ૧૫મી સુધી ઓનલાઇન રજિસ્ટ્રેશનની છૂટ આપવામાં આવી છે. આગામી તા.૨૧મીએ સવારે ૧૧થી ૧ દરમિયાન એમ.ફીલ માટે એન્ટ્રન્સ ટેસ્ટ લેવાશે. બપોરે ૨-૩૦થી ૫ દરમિયાન પીએચડીમાં પ્રવેશ માટે પરીક્ષા લેવાશે. એમ.ફીલ ૧૨૦ અને પીએચડીમાં ૧૫૦ માર્કસના પ્રશ્નો પૂછાશે. સામાન્ય રીતે અત્યાર સુધી બન્ને પરીક્ષાઓમાં સબ્જેક્ટિવ પ્રશ્નોને મહત્વ અપાતું હતું. પરંતુ પ્રથમ વખત તમામ પ્રશ્નો ઓબ્જેક્ટિવ અને એમસીક્યુ પ્રકારના પૂછાશે. અગાઉ એનએસયુઆઇ દ્વારા પીએચડીની પરીક્ષા ગુજરાતીમાં લેવા માટે માંગણી કરાઈ હતી. જેના અનુસંધાનમાં તમામ એમસીક્યુ પ્રકારના પ્રશ્નો પૂછવાનું નક્કી કરાયું હતું.