અમદાવાદઃ ડેંગ્યુએ વધુ એક મેડિકલ સ્ટુડન્ટનો ભોગ લીધો, 20 વર્ષની યુવતીનું મોત

અમદાવાદઃ રાજ્યભરમાં ડેંગ્યુનો પ્રકોપ દિવસેને દિવસે વધી રહ્યો છે. અમદાવાદ, જામનગર, રાજકોટ, વડોદરા સહિતના મોટા શહેરોમાં અત્યાર સુધીમાં ડેંગ્યુના હજારો કેસો સામે આવી ચૂક્યા છે. ત્યારે વધુ એક મેડિકલ સ્ટુડન્ટે ડેંગ્યુના કારણે જીવ ગુમાવ્યો છે. રાજ્યના હેલ્થ વિભાગના સત્તાધીકારીઓએ કહ્યું કે, 20 વર્ષની MBBSની વિદ્યાર્થિની રિયા પટેલ શહેરની એક પ્રાઈવેટ હોસ્પિટલમાં શુક્રવારે ડેંગ્યુના કારણે મૃત્યુ પામી. રાજ્યના હેલ્થ વિભાગના સત્તાધિકારીઓએ TOIને જણાવ્યું કે, અમે પેશન્ટના રેકોર્ડનું વિશ્લેષણ કરી રહ્યા છીએ અને શહેરના મ્યુનિસિપલ હેલ્થ અધિકારીઓને જાણ કરીશું. અધિકારીઓએ પ્રાઈવેટ હોસ્પિટલનું નામ નહોતું જણાવ્યું. રિયા પાટણના સિદ્ધપુર તાલુકાના કલ્યાણ ગામની કૃષ્ણાનગર સોસાયટીની રહેવાસી હતી. રિયા જામનગરની મેડિકલ કોલેજના ત્રીજા વર્ષમાં અભ્યાસ કરતી હતી અને પાછલા થોડા દિવસથી પોતાના ઘરે હતી. જ્યાં તે બીમાર પડી ગઈ. રાજ્યના હેલ્થ અધિકારી જણાવ્યું, ઘરમાં તેની સ્થિતિ વધારે ખરાબ થતા અમદાવાદની એક ખાનગી હોસ્પિટલમાં એડમિટ કરવામાં આવી હતી. અધિકારીએ જણાવ્યું કે આ સીઝનમાં ચાર પ્રકારના ડેંગ્યુના સબટાઈપ વાઈરસ ખૂબ જીવલેણ સાબિત થયા છે. જેમાં DenV2 અને Denv3 સબટાઈપ સૌથી ઘાતક સાબિત થયા છે. ઉલ્લેખનીય છે કે પાછલા થોડાક દિવસોમાં ડેંગ્યુના 946 કેસો સામે આવ્યા છે. જામનગર શહેરમાં 16 ઓક્ટોબર સુધીમાં 1099 ડેંગ્યુના કેસ નોંધાયા હતા. જ્યારે અમદાવાદમાં આ આંકડો 1933 કેસોનો છે જેમાંથી 946 માત્ર પાછલા એક મહિનામાં નોંધાયો છે.