Ahmedabad Metro: અમદાવાદમાં હવે ક્યાં-ક્યાં મેટ્રો ટ્રેન શરુ થશે? PMની સૂચનાથી સરકારે શરુ કરી મોટી તૈયારી

Ahmedabad Metro: ગાંધીનગર: અમદાવાદમાં મેટ્રોની બંને લાઈનનો પ્રારંભ થઈ ગયા બાદ હવે શહેરી વિકાસ વિભાગ અમદાવાદ તેમજ તેની આસપાસના કયા વિસ્તારોમાં મેટ્રો સર્વિસ શરુ કરી શકાય તેનો એક્શન પ્લાન બનાવવાની શરુઆત કરી દીધી છે. પીએમ મોદીએ 15 દિવસ પહેલા જ ફેઝ-1નું ઉદ્ઘાટન કર્યું હતું, તે વખતે તેમણે ઉચ્ચ અધિકારીઓને શહેરના કયા-કયા વિસ્તારોને આ સર્વિસથી સાંકળી શકાય તેમ છે તેનો પ્લાન બનાવવાનું પણ સૂચન કર્યું હતું.

એક સૂત્રના જણાવ્યા અનુસાર, મેટ્રોના ઉદ્ઘાટન બાદ પીએમ મોદી અધિકારીઓને મળ્યા હતા અને તેમણે કેટલાક મહત્વના સૂચનો કર્યા હતા. તેમણે મેટ્રો સર્વિસ સારી રીતે મેઈન્ટેઈન થાય તેમજ અમદાવાદના અન્ય વિસ્તારો જ નહીં, પરંતુ શહેરની હદની બહાર વિકસેલા વિસ્તારોને પણ તેનાથી સાંકળી લેવાય તે માટે પ્લાન બનાવવા જણાવ્યું હતું.

હાલ અમદાવાદ મેટ્રોમાં સારો એવો ધસારો જોવા મળી રહ્યો છે. જોકે, મેટ્રોની મુસાફરી કરતા મોટાભાગના લોકો માત્ર જોય રાઈડ માટે જ આવી રહ્યા છે. અમુક સમય બાદ લોકોનો ઉત્સાહ ઓસરશે અને મેટ્રોના પેસેન્જર્સનું પ્રમાણ ઘટશે તેવી પણ શક્યતા છે. તેવામાં લોકો આ સર્વિસનો ઉપયોગ કરતા થાય તે માટે તેને તેમને પ્રોત્સાહિત કરવા પણ જરુરી છે. જેના ભાગરુપે મેટ્રોનો વિસ્તાર વધારવામાં આવશે.

અમદાવાદમાં ક્યાં-ક્યાં મેટ્રો સર્વિસ ચાલુ થઈ શકે તેમ છે તેવા વિસ્તારોનું મેપિંગ કરવાની કામગીરી શરુ થઈ ગઈ છે. દિલ્હીમાં પણ પહેલા બે છેડા મેટ્રોથી સાંકળવામાં આવ્યા હતા અને ત્યારબાદ અન્ય વિસ્તારોને તેનાથી કનેક્ટ કરાયા હતા. તે જ રીતે, અમદાવાદ પૂર્વ અને પશ્ચિમના વિસ્તારોને મેટ્રોથી સાંકળવાનો સરકારનો પ્લાન છે. આ સિવાય એસજી રોડ તેમજ એસપી રિંગ રોડ અને તેની પણ બહાર વિકસેલા અમદાવાદ, ગાંધીનગરના વિસ્તારોને પણ મેટ્રોથી કનેક્ટ કરાશે, જેમાં સાણંદ, થોળ, કલોલ, કડીનો પણ સમાવેશ થઈ શકે છે, કારણકે અહીંથી મોટી સંખ્યામાં લોકો અમદાવાદ કે ગાંધીનગર રોજેરોજ અપડાઉન કરે છે.

મેટ્રોનો વ્યાપ વધારવા માટે રાજ્ય સરકાર આગામી બજેટમાં ખાસ ફાળવણી પણ કરી શકે છે. મેટ્રોના નવા કોરિડોરની પણ જાહેરાત થઈ શકે છે. જેના માટે ફંડ પણ જલ્દી ફાળવવામાં આવશે.