કોરોના: રાજ્યમાં 2.36 લાખ વિદ્યાર્થીઓએ ખાનગીમાંથી સરકારી સ્કૂલોમાં એડમિશન લીધું

ભરત યાજ્ઞિક, અમદાવાદઃ દેશમાં કોરોના વાયરસે હાહાકાર મચાવ્યો છે. જેના કારણે મધ્યમ અને ગરીબ વર્ગના લોકોને પીસાવાનો વારો આવ્યો છે. બીજી તરફ ખાનગી સ્કૂલો બેફામ થઈને ફી વસૂલી રહી છે. આ વચ્ચે ગુજરાતમાં 2.36 લાખ વિદ્યાર્થીઓ ખાનગી સ્કૂલોમાંથી સરકારી સ્કૂલોમાં શિફ્ટ થયા હોવાનું સામે આવ્યું છે.

દુધેશ્વર વિસ્તારમાં રહેતા સફાઈ કામદાર રજનીકાંત સોલંકીને મહામારીના કારણે જ્યારે 20 ટકા પગાર કાપ કરવામાં આવ્યો ત્યારે તેઓ ચિંતિત થઈ ગયા હતા. તેમની માસિક આવક હવે ઘટીને 6500 રૂપિયા થઈ ગઈ છે. જેના કારણે તેમને તેમની બે દીકરીઓને ખાનગી સ્કૂલમાં ભણવા મોકલવી કે પછી તેમનું પેટ ભરવું તે વચ્ચેનો મુશ્કેલ નિર્ણય લેવો પડ્યો હતો.

તેમની બે દીકરીઓની વાર્ષિક ફી 10 હજાર રૂપિયા હોવાથી સોલંકીએ શાળા પાસેથી આર્થિક મદદ માગી હતી. અધિકારીઓ તરફથી કોઈ જવાબ ન મળતા દીકરીઓને ખાનગી શાળામાં ભણાવવાનું તેમનું સપનું રોળાઈ ગયું. જે બાદ તેમણે શાહીબાગ શાળા નંબર 6માં 7માં ધોરણમાં ભણતી મોટી દીકરી અને ત્રીજા ધોરણમાં ભણતી નાની દીકરીનું એડમિશન લઈ લીધું.

સોલંકીએ કહ્યું કે, શિક્ષણની ગુણવત્તા અંગેની તેમની શંકાઓ નિરાધાર હતી કારણ કે દીકરીઓએ ઓનલાઈન ક્લાસ શરુ કરી દીધા હતા. 'ફી વસૂલવા છતા ખાનગી શાળાઓ ઓનલાઈન શિક્ષણ આપતી નથી', તેમ તેમણે કહ્યું હતું.

કોરોના મહામારીના કારણે આર્થિક મંદી, પગારકાપ અને ઓછી આવક સામે લોકો ઝઝૂમી રહ્યા છે, ત્યારે ગુજરાતની સરકારી અને ગ્રાન્ડ-ઈન એઈડ સ્કૂલોમાં સેલ્ફ-ફાયનાન્સ સ્કૂલોના વિદ્યાર્થીઓનો ધસારો જોવા મળી રહ્યો છે. હકીકતમાં, આવા વિદ્યાર્થીઓની સંખ્યામાં 30 ટકાનો વધારો જોવા મળ્યો છે.

'આ વર્ષે રાજ્યમાં સેલ્ફ-ફાયનાન્સ સ્કૂલોમાંથી 2.36 લાખ વિદ્યાર્થીઓ ખાનગી અને ગ્રાન્ટ-ઈન એઈડ સ્કૂલોમાં શિફ્ટ થયા છે', તેમ શિક્ષણ વિભાગના સેક્રેટરી વિનોદ રાવે જણાવ્યું હતું.

સરકારી સ્કૂલો જ એકમાત્ર આશાઃ
'આ વર્ષે રાજ્યમાં સેલ્ફ-ફાયનાન્સ સ્કૂલોમાંથી 2.36 લાખ વિદ્યાર્થીઓ ખાનગી અને ગ્રાન્ટ-ઈન એઈડ સ્કૂલોમાં શિફ્ટ થયા છે. ગયા વર્ષે આ આંકડો 1.7 લાખ હતો. આ પરિવર્તનનું સૌથી મોટુ કારણ હોમ-લર્નિંગ છે', તેમ વિનોદ રાવે કહ્યુ હતુ.

'વિદ્યાર્થીઓ વધુ સારી રીતે શીખી શકે તે માટે સરકારે 1500 સ્માર્ટ ક્લાસ અને QR કોડ સાથે પાઠ્યપુસ્તકો શરુ કર્યા છે. વિદ્યાર્થીઓ માટે ઓડિયો-વીડિયો કન્ટેન્ટ પણ બનાવવામાં આવ્યા છે. આ તમામ પગલાઓને લીધે સરકાર દ્વારા સંચાલિત શાળાઓ પસંદ કરતા વિદ્યાર્થીઓની સંખ્યામાં વધારો થયો છે', તેમ રાવે ઉમેર્યું હતું.

સૂત્રોના જણાવ્યા પ્રમાણે, નોકરી ગુમાવવાના કારણે, પગારમાં ઘટાડો તેમજ ધંધામાં થયેલા નુકસાનના કારણે સેલ્ફ-ફાયનાન્સ સ્કૂલોમાં અભ્યાસ કરતાં 20 ટકા વિદ્યાર્થીઓના વાલીઓએ ચાલુ શૈક્ષણિક વર્ષની ફી હજુ ભરી નથી. આશરે 33,000 સરકારી અને 5,000 ગ્રાન્ટ-ઈન એઈડ શાળાઓ એવી છે જે આર્થિક સંકટનો સામનો કરી રહેલા વાલીઓ માટે આશા સમાન છે. આ શાળાઓમાં 50 લાખથી વધુ વિદ્યાર્થીઓ છે.

અમદાવાદ મહાનગરપાલિકા સ્કૂલ બોર્ડ એડમિનિસ્ટ્રેટિવ ઓફિસર એલ.ડી. દેસાઈએ કહ્યું કે, AMC સ્કૂલોમાં ગયા વર્ષ કરતાં આ વર્ષે 14 હજાર વિદ્યાર્થીઓનો વધારો જોવા મળ્યો છે, જે તમામ ખાનગી શાળાઓમાંથી આવ્યા છે. રિક્ષા ચલાવતા દિનેશ ઠાકોરે કહ્યું કે, તેમણે પાલડીમાં આવેલી ખાનગી સ્કૂલમાં ભણતી તેમની બંને દીકરીઓનું એડમિશન કાંકરિયા પબ્લિક સ્કૂલમાં લઈ લીધું છે. 'કોવિડ 19ના કારણે લોકો રિક્ષામાં બેસતા ડરી રહ્યા છે, જેના કારણે આવક 80 ટકા ઓછી થઈ ગઈ છે. આટલી આવકમાં ત્રણ સમય જમવાનું પણ માંડ થાય છે. આવી સ્થિતિમાં વાર્ષિક ફી પેટે 26,000 કેવી રીતે ભરવા', તેમ ઠાકોરે જણાવ્યું હતું.