VAYU Cyclone: 12થી 14 જુન દરમિયાન ગુજરાતના આ જિલ્લાઓ પર આફતના એંધાણ

અમદાવાદ: VAYU સાયક્લોન ગુજરાત ભણી આગળ વધી રહ્યું છે, અને 12 તારીખે રાત્રે તે ગુજરાત પર ત્રાટકે તેવી સંભાવના છે. હવામાન ખાતાએ ખાસ બુલેટિન બહાર પાડીને 12 થી 14 જૂનના ગાળામાં કયા જિલ્લામાં VAYUની સૌથી વધુ અસર રહેશે તેની માહિતી જાહેર કરી છે. વાયુની અસર હેઠળ ગુજરાતમાં તેનાથી પ્રભાવિત જિલ્લામાં 130-140 કિમી પ્રતિ કલાકની ઝડપે ભારે પવન ફુંકાવાની સાથે અતિભારે વરસાદ પણ પડી શકે છે. હવે સીધા Whatsapp પર મેળવો મહત્વના ન્યૂઝ, શરુ કરવા ક્લિક કરો હવામાન ખાતા દ્વારા જણાવાયું છે કે, 12 જુનના રોજ વાયુના આગમન સાથે અમરેલી, ગીર, જુનાગઢ, પોરબંદર, દેવભૂમિ દ્વારકા અને જામનગર જિલ્લામાં સાવધાની રાખવી પડે તેવી સ્થિતિ હશે. રાજ્યના બનાસકાંઠા, કચ્છ, સાબરકાંઠા, આણંદ, ભાવનગર, વડોદરા, રાજકોટ, ભરુચમાં તેનાથી સામાન્ય વરસાદની શક્યતા છે. જ્યારે, સુરત, નવસારી, વલસાડમાં ભારે વરસાદ થઈ શકે છે. 12 જુને જામનગર, પોરબંદર, જુનાગઢ, અમરેલી, દેવભૂમિ દ્વારકા, ગીર સોમનાથ અને દીવમાં અતિભારે વરસાદની શક્યતા છે. 13મી જૂને શું હશે સ્થિતિ? 13મી જૂનના રોજ વાયુની અસર હેઠળ મધ્ય ગુજરાત અને ઉત્તર ગુજરાતમાં સામાન્ય, દક્ષિણ ગુજરાતમાં ભારે વરસાદની શક્યતા છે. સૌરાષ્ટ્રના રાજકોટ, જામનગરમાં 13મી જૂને ભારે વરસાદ થઈ શકે છે. જ્યારે, આ દિવસે પોરબંદર, જૂનાગઢ, અમરેલી, ગીર સોમનાથ અને દિવમાં અતિભારે વરસાદ પડવાની હવામાન ખાતાએ ચેતવણી આપી છે. 14 જૂનથી અસર ઓછી થશે વાયુની અસર ઓછી થતાં મધ્ય ગુજરાતમાં સામાન્ય વરસાદ થઈ શકે છે. દક્ષિણ ગુજરાતમાં આ દિવસે વરસાદ થવાની સંભાવના નથી. જોકે, સૌરાષ્ટ્રમાં તેની અસર હજુય વર્તાશે. રાજકોટમાં આ દિવસે સામાન્ય વરસાદ થઈ શકે છે. જામનગર, પોરબંદર, દેવભૂમિ દ્વારકા, કચ્છમાં આ દરમિયાન ભારેથી અતિભારે વરસાદની શક્યતા છે.