MYSY યોજના 4 માસમાં 74 લાખ લોકો સુધી પહોંચી

નવગુજરાત સમય > ગાંધીનગર

— વિધાનસભા ગૃહમાં ગુરુવારે માહિતી પ્રસારણ વિભાગના બજેટ પર ચર્ચા હાથ ધરાઈ હતી. જેમાં વિરોધ પક્ષ તરફથી ખાતાની કામગીરીની આકરી ટીકા કરાઈ હતી પરંતુ તેના જવાબમાં મંત્રી પ્રદીપસિંહ જાડેજાએ માહિતી ખાતાને સંવેનશીલ ખાતું ગણાવીને કહ્યું હતું કે, રાજ્યના યુવાનો માટે સૌથી વધુ જરૂરી એવી મુખ્યમંત્રી યુવા સ્વાવલંબન યોજના (MYSY) માત્ર ચાર માસના સમયમાં 73.49 લાખ લોકો સુધી પહોંચી છે. આ ખાતું હંમેશા મિશન મોડ પર જ હોય છે. તેમણે કહ્યું હતું કે, સરકાર અને પ્રજા વચ્ચે સેતુ બનીને આ ખાતાએ ટેકનોલોજીનો શ્રેષ્ઠ ઉપયોગ કર્યો છે. વોટ્સએપ, ફેસબુક, ટ્વીટર, ઈમેઈલ કે વેબસાઈટ દ્વારા તેમણે સરકારની વિકાસની વાતો, વિવિધ યોજનાઓને લોકો સુધી પહોંચાડી છે. વિધાનસભા ગૃહમાં થતી કામગીરીને પણ તેઓ લોકશાહીના ધબકારા શ્રેણી દ્વારા ટેલિવિઝનના માધ્યમથી લોકો સુધી પહોંચાડે છે. આ ખાતા દ્વારા તૈયાર કરાતા ગુજરાત અંક કે દિવાળી વિશેષાંકમાં પણ રાજ્યનું ઝમીર અને ખમીર દેખાય છે. ગુજરાત પાક્ષિકમાં પણ લોક કલ્યાણની વાતો, બુધ્ધિજીવી લેખકોના લેખો, મહિલા સશક્તિકરણ જેવી હકારાત્મક બાબતોની જનતાને જાણકારી આપવામાં આવે છે. ‘સાથ શબ્દોના, નાદ વિકાસનો’ તે માહિતી ખાતાનો મંત્ર છે.