ત્રણ વર્ષ પછી ફરી એકવાર અમદાવાદમાં સીટ બેલ્ટ વગર કાર ચલાવશો તો મળશે ઈ-મેમો

અમદાવાદઃ કાર ચાલકોને સીટ બેલ્ટ વગર કાર ચલાવવા પર ઈ મેમો આપવાનું અટકાવ્યાના આશરે ત્રણ વર્ષ બાદ ફરી એકવાર શહેર ટ્રાફિક પોલીસ નવી એડવાન્સ ટેક્નોલોજી સાથે તૈયાર છે. જે કાર ચાલકો કાર ચલાવતા સમયે શહેરમાં સીટ બેલ્ટ નહીં પહેરતા હોય તેમને ફરી એકવાર ઈ મેમો મોકલવામાં આવશે.

જે તે સમયે ખોટી રીતે સીટ બેલ્ટ બાબતે ઈ મેમો મોકલવાને લઈને હોબાળો થયા બાદ સપ્ટેમ્બર 2017માં શહેર ટ્રાફિક પોલીસે સીટ બેલ્ટ અંગેનો ડિજિટલ મેમો મોકલવાનું બંધ કર્યું હતું.

શહેર ટ્રાફિક પોલીસના ડે. પોલીસ કમિશનર તેજસ પટેલે કહ્યું કે ''તે સમયે એવા લોકોને જ સીટ બેલ્ટ અંગે ઈ મેમો મોકલવામાં આવતો હતો જેમના સીસીટીવી ફૂટેજમાં સ્પષ્ટ જોઈ શકાતું હોય કે તેમણે સીટ બેલ્ટ નથી પહેર્યો. પરંતુ કેટલાક એવા કિસ્સા જોવા મળ્યા હતા જેમાં ફૂટેજ ક્લિયર ન હોય ત્યારે અંદાજીત રીતે સીટ બેલ્ટ નિયમ તોડવા બદલ ચાલકને ઈ મેમો પાઠવામાં આવતો હતો. પરંતુ પછી તે સમયે જ નક્કી કરવામાં આવ્યું હતું કે સીટ બેલ્ટ ન પહેરવા માટે ચાલકને ઈ મેમો નહીં પાઠવવામાં આવે.'

આવા એક કિસ્સામાં આંબાવાડીમાં રહેતા વ્યક્તિને ઈ ચાલાન સ્વરુપે રુ. 1000નો દંડ કરવામાં આવ્યો હતો. કારણ કે સીસીટીવી કેમેરા તે વ્યક્તિએ પહેરેલો સફેદ રંગનો બેલ્ટ દેખાતો નહોતો.

પહેલા ઈ મેમો પોલીસ દ્વારા ઈશ્યુ થતો હતો જેઓ શહેરનો રીયલ ટાઈમ ટ્રાફિક મોનિટર કરે છે. પરંતુ હવે ટ્રાફિક અધિકારીઓના જણાવ્યા અનુસાર વધુ એડવાન્સ્ડ સિસ્ટમ આવ્યા બાદ ઈન્ટેલિજન્ટ કેમેરા ભરચક ટ્રાફિકમાંથી પણ સીટ બેલ્ટ વગરના કાર ચાલકોને શોધી તેમને ટ્રેક કરશે અને તેમની ગાડીના નંબરને આધારે ઈ-મેમો તૈયાર કરીને ઓટોમેટિકલી તેમને મોકલી આપશે.

ટ્રાફિક વિભાગના ઉચ્ચ અધિકારીઓએ કહ્યું કે 'હવે અત્યાધુનિક સિસ્ટમ સાથેના ઈન્ટેલિજન્ટ કેમેરા શહેરની ટ્રાફિક મોનિટરિંગ સિસ્ટમનું ધ્યાન રાખશે. આ કેમેરા દ્વારા લેવામાં આવેલ ઈમેજનું સોફ્ટવેર એનાલિસિસ કરશે અને એ બાબતની ખરાઈ કરશે કે વ્યક્તિએ સીટ બેલ્ટ પહેર્યો છે કે નહીં.' તેમણે દાવો કર્યો કે આના કારણે વધુ સચોટ ઈ મેમો લોકોને આપવામાં આવશે. તેનાથી શહેરમાં ડ્રાઇવ કરતા લોકોની સેફ્ટી વધશે સાથે સાથે વિભાગને દંડના સ્વરુપે આવક પણ વધશે.