ફી નહીં તો ઓનલાઈન ક્લાસ નહીં તેવો મુદ્દો સામે આવતા મમ્મીઓ એક્ટિવ થઈ

અમદાવાદઃ ગુજરાત સ્વનિર્ભર શાળા સંચાલક મંડળ (The Gujarat self financed school Management Association) દ્વારા વાલીઓ સ્કૂલની ફી નહીં ભરે તો બાળકોનું ઓનલાઈન શિક્ષણ બંધ કરવામાં આવશે તેવા નિર્ણય બાદ વાલીઓ એક્ટિવ થયા છે. પેરેન્ટ્સ મિટિંગ અને સ્કૂલની વિઝિટ દરમિયાન અન્ય વાલીઓના નંબરો મેળવીને મેન્જિંગ એપ અને સોશિયલ મીડિયા પર કનેક્ટ રહેતા વાલીઓ હવે ફી મામલે નિર્ણય લેવા માગે છે.

કેટલાક કિસ્સામાં ડૉક્ટર, વેપારી કે પગાર ના કપાયો હોય અને પોતાનો ધંધો લોકડાઉન દરમિયાન પણ ચાલુ રહ્યો હોય તેવા વાલીઓએ પણ લોકડાઉન પછી લાંબા સમય સુધી સ્કૂલની ફી ભરવાનું ટાળ્યું હતું. આવામાં ઘણી સ્કૂલો દ્વારા વારંવાર મેસેજ મોકલાયા પછી પણ વાલીઓ દ્વારા ફી ભરવામાં ના આવી હોવાથી તેમને ફોન કરીને પોતાના બાળકની સ્કૂલ ફી ભરવા માટે જણાવવામાં આવ્યું હતું. આમ છતાં ઘણાં વાલીઓએ સ્કૂલ ફી ભરવાનું ટાળ્યું હતું. પરંતુ ગુજરાત સ્વનિર્ભર શાળા સંચાલક મંડળ દ્વારા ફી ના ભરનારા વાલીઓ સામે પગલા ભરીને તેમના બાળકોને ઓનલાઈન શિક્ષણ નહીં આપવાનો નિર્ણય કર્યો છે.

દિવાળી પહેલા પણ ઘણી સ્કૂલો દ્વારા ફીમાં ડિસ્કાઉન્ટ આપવાની અને વાલીઓને ફી ભરી જવાની વાત કરી હતી. જે દરમિયાન ઘણાં વાલીઓએ સ્કૂલની વાત માનીને બાળકોની જૂન મહિનાથી બાકી રહેતી ફી ભરી હતી. આમ છતાં કેટલાક વાલીઓએ સ્કૂલની ફી ભરવાનું ટાળ્યું હતું. iamgujarat.com સાથે કેટલાક વાલીઓએ વાત કરી તેમાં પણ તેમણે જણાવ્યું કે, દિવાળી પહેલા સ્કૂલમાંથી ફોન આવ્યા હતા અને તે પછી દિવાળીના ખર્ચામાં કાપ મૂકીને અમે પહેલા બાળકોની ફી ભરી દીધી હતી.

શાળ સંચાલક મંડળ દ્વારા જે નિર્ણય લેવાયો છે તે પછી વોટ્સએપ ગ્રુપ અને ફેસબૂક દ્વારા અન્ય વિદ્યાર્થીઓના વાલીઓ સાથે સંપર્કમાં રહેલી મમ્મીઓ એક્ટિવ થઈ ગઈ છે, હવે ફી ભરવી કે ના ભરવી તે અંગે શું નિર્ણય લેવો તે અંગેની ચર્ચા-વિચાર્ણાઓ શરુ થઈ ગઈ છે. સામાન્ય રીતે જૂન મહિનામાં ફી ના ભરી હોય તે વાલીઓએ હવે 18થી 25 હજાર સુધીની ફી ભરવાનો વારો આવ્યો છે.

મુદ્દાની વાત એ છે કે, જે વાલીઓ ખરેખર ફી ભરી શકે તેમ નહોતા તેમણે અગાઉથી જ સ્કૂલોને પોતાની આર્થિક સ્થિતિ અંગે જાણ કરી દીધી હતી, આવા વાલીઓને સ્કૂલ તરફથી પણ સાથ સહકાર મળ્યો છે. જોકે, કેટલાક વાલીઓ દ્વારા સતત સ્કૂલ દ્વારા ફી માટે આવતા મેસેજ અને ફોનને ગણકારવામાં નહોતા આવતા. જેને ધ્યાને લઈને ગુજરાત સ્વનિર્ભર શાળા સંચાલક મંડળ દ્વારા આવા વાલીઓ સામે પગલા ભરવાની વાત કરાઈ છે.