સરકારી વ્યવસ્થામાં સ્લોટ જ નથી, ખાનગી હોસ્પિ.માં પૈસાથી માંગો એટલી રસી

અમદાવાદ: જીવલેણ કોરોના વાયરસ સામે રક્ષણ મેળવવા માટે કોરોના વેક્સીન ખૂબ જ જરૂરી છે. ગુજરાતમાં પહેલી મેથી 18થી 44 વર્ષના લોકોને રસી આપવાની કામગીરી શરૂ કરવામાં આવી હતી. જો કે, રસીની અછતના લીધે હજી પણ લોકોને સરકારી વ્યવસ્થામાં ઓનલાઈન બૂકિંગમાં વેક્સીન સ્લોટ દેખાતા નથી. જો કે, બીજી તરફ ખાનગી હોસ્પિટલોમાં રૂપિયા આપીને માંગો તેટલી રસી ઉપલબ્ધ હોવાનું સામે આવ્યું છે.

આમ રાજ્યમાં સરકારી વ્યવસ્થામાં રસીની અછત ક્યારે દૂર થશે તે હજુ નક્કી નથી ત્યારે ખાનગી હોસ્પિટલો પાસે રસીનો પુરતો સ્ટોક આવી જતાં મનફાવે તેટલા ભાવે રસીનો વેપલો શરૂ કરી દીધો છે. મીડિયા રિપોર્ટ મુજબ રાજ્યના પાંચ મહાનગરોમાં ખાનગી હોસ્પિટલો જાણે ખુલ્લી લૂંટ ચલાવતી હોય તેમ 850થી લઈને 1500 રૂપિયા સુધીનો ચાર્જ વસૂલી રહ્યા છે.
મીડિયા રિપોર્ટ મુજબ કોવિન પોર્ટલ પર ખાનગી હોસ્પિટલોમાં વેક્સીનના ભાવ અને તેના સ્લોટની ઉપલબ્ધતા દર્શાવાઈ છે. જેમાં અમદાવાદની 5 હોસ્પિટલ, ગાંધીનગરની એક હોસ્પિટલ, રાજકોટની એક હોસ્પિટલ, સુરતની બે હોસ્પિટલ અને વડોદરાની બે હોસ્પિટલનો સમાવેશ થાય છે. આ તમામ ખાનગી હોસ્પિટલોમાં કોવિશીલ્ડ રસીનો ચાર્જ 850થી 950 રૂપિયા જ્યારે કોવેક્સિન રસીનો ચાર્જ 1250થી 1500 રુપિયા સુધીનો દર્શાવાયો છે.
એક જ કંપનીની વેક્સીન હોવા છતાં શહેર અને હોસ્પિટલ મુજબ અલગ-અલગ ચાર્જ વસૂલવામાં આવી રહ્યો છે. એટલું જ નહીં, કોવિન પોર્ટલ પર પૈસા આપીને રસી લેવા માટેના સ્લોટનું બુકિંગ પણ આસાનાથી થઈ શકે છે. એનો મતબલ એ છે કે, સરકાર પાસે રસી જ નથી, જ્યારે ખાનગી હોસ્પિટલો પાસે કોરોનાની વેક્સીનો પૂરતો સ્ટોક ઉપલબ્ધ છે.
ખાનગી હોસ્પિટલોમાં લૂંટ
ગાંધીનગર: માતુલ્ય વુમન્સ હોસ્પિટલ- 1500
વડોદરા: સનશાઈન ગ્લોબલ હોસ્પિટલ- 950
અમદાવાદ: એપોલો CBCC- 850
અમદાવાદ: ક્રિષ્ના શેલ્બી હોસ્પિટલ- 850

પ્રાપ્ત માહિતી પ્રમાણે વેક્સિનેશનની શરૂઆતમાં ખાનગી હોસ્પિટલોમાં વેક્સીનના એક ડોઝના 250 રૂપિયા ચાર્જ વસૂલવામાં આવતો હતો. જે હવે 1500 રૂપિયા સુધી પહોંચી ગયા હોવાનું જાણવા મળ્યું છે. આરોગ્ય સેતુ એપ્લિકેશન પર પેઈડ સ્લોટ ચેક કરતા ક્રિષ્ના શેલ્બી હોસ્પિટલમાં 4 જૂનથી લઈને 9 જૂન સુધી માટે બધા સ્લોટ ઉપલબ્ધ છે. જ્યારે તેની સામે અર્બન હેલ્થ સેન્ટરમાં તપાસ કરતા એક પણ સ્લોટ ખાલી જોવા મળ્યો નથી.