કોરોના વાયરસઃ અમદાવાદના ઉત્તર-પશ્ચિમ ઝોનમાં એક્ટિવ કેસોની સંખ્યા 600ને પાર

હિમાંશુ કૌશિક, અમદાવાદઃ ગુજરાતમાં કોરોનાના કેસ દિવસેને દિવસે વધી રહ્યા છે. ખાસ કરીને અમદાવાદ તેમજ સુરતમાં રોજ વધારે નવા કેસ સામે આવી રહ્યા છે. આ વચ્ચે અમદવાદના ઉત્તર-પશ્ચિમ ઝોનમાં આવતા બોડકદેવ, થલતેજ, ઘાટલોડિયા અને ગોતામાં એપ્રિલ બાદ પહેલીવાર એક્ટિવ કેસનો આંકડો 600ને પાર પહોંચી ગયો છે. દક્ષિણ-પશ્ચિમ ઝોનમાં આવતા જોધપુર, વેજલપુર અને બોપલ-ઘુમા જેવા વિસ્તારોમાં તેમજ પશ્ચિમ ઝોનમાં આવતા નારણપુરા, નવરંગપુરા, રાણીપ, પાલડી અને વાસણા વિસ્તારોમાં એક્ટિવ કેસોની સંખ્યા 600ની નજીક છે. 1 સપ્ટેમ્બરથી 8 સપ્ટેમ્બરની વચ્ચે શહેરમાં એક્ટિવ કેસોની સંખ્યામાં 586નો વધારો થયો છે, પરંતુ પશ્ચિમ ભાગોમાં 390નો વધારો થયો છે.

પશ્ચિમ ઝોનના વિસ્તારો કે જે એપ્રિલ અને મે મહિનામાં ક્વોરન્ટિન હતા, ત્યાં ફરીથી કેસોમાં વધારો થતો જોવા મળી રહ્યો છે. આ ઝોનમાં પણ એક્ટિવ કેસોની સંખ્યા 500 છે. શહેરના પશ્ચિમ ભાગના અધિકારીઓએ કહ્યું કે, મજૂરો તેમજ ઓફિસમાં પણ હાથ ધરવામાં આવેલા ચેકિંગ દરમિયાન કેસોની સંખ્યા વધારે જોવા મળી હતી.

એક વરિષ્ઠ અધિકારીએ જણાવ્યું હતું કે, અધિકારીઓએ શહેરના આ ભાગમાં આક્રમક ટેસ્ટિંગ સ્ટ્રેટેજી અપનાવી છે અને તેના કારણે આ વિસ્તારોમાંથી વધુને વધુ કેસ સામે આવી રહ્યા છે. આ વિસ્તારોમાં ઘણા શોપિંગ કોમ્પ્લેક્સ અને મોલ્સ છે.

અધિકારીઓએ કહ્યું કે, અગાઉ આરોગ્ય સેતુ એપના માધ્યમથી કોવિડ શંકાસ્પદો વિશે જાણ કરવામાં સક્ષમ હતા, પરંતુ હવે તેમને જાણ થઈ છે કે ઘણા લોકો પોતાના મોબાઈલમાં બ્લૂટૂથ ઓન રાખતા નથી. આ કેટલાક વિસ્તારોમાં કેસના કૉન્સેન્ટ્રેશન મેળવવામાં મદદ કરી રહ્યું નથી.