રાજ્યના ઈન્ટર્ન ડોક્ટર્સના સ્ટાઈપેન્ડમાં 5000નો વધારો, હવે 18000 રૂપિયા મળશે

અમદાવાદ: સ્ટાઈપેન્ડમાં વધારાની માગ સાથે ગુજરાતમાં ઈન્ટર્ન ડૉક્ટર્સ હડતાળ પર ઉતર્યા હતા. રાજ્ય સરકારે ઈન્ટર્ન ડોક્ટર્સની માગણીને ધ્યાનમાં રાખતા મહત્વનો નિર્ણય લીધો હતો. ત્યારે આજે ફરી એકવખત રાજ્યના નાયબ મુખ્યમંત્રી નીતિન પટેલે ઈન્ટર્ન ડોક્ટર્સની સાથે બેઠક કરી હતી કે જેમાં આરોગ્ય સચિવ જયંતી રવિ પણ જોડાયા હતા. રાજ્યના આરોગ્યમંત્રી તેમજ નાયબ મુખ્યમંત્રી નીતિન પટેલે ઈન્ટર્ન ડોક્ટર્સની માગણીને ધ્યાનમાં રાખતા સ્ટાઈપેન્ડમાં 5,000 રૂપિયાનો વધારો કરવાની જાહેરાત કરી હતી. જેના પગલે હવે ઈન્ટર્ન ડોક્ટર્સને 18 હજાર રૂપિયાનું સ્ટાઈપેન્ડ ચૂકવાશે.

આ બેઠકમાં નાયબ મુખ્યમંત્રી નીતિન પટેલે ઈન્ટર્ન ડૉક્ટર્સને 13000 રૂપિયાના સ્ટાઈપેન્ડમાં ચાલુ વર્ષ માટે 5000 રૂપિયાનો વધારો કરીને હવે 18 હજાર રૂપિયા આપવાની જાહેરાત કરી હતી. આ જાહેરાત બાદ ઈન્ટર્ન ડૉક્ટર્સે સરકારના નિર્ણયને આવકાર્યો હતો. તેમણે કહ્યું હતું કે સરકારના નિર્ણયથી અમને સન્માન મળ્યું છે.

રાજ્ય સરકારે સ્ટાઈપેન્ડ વધારાની માગ સ્વીકારતા આ બાબતે સમાધાન થયું હતું. ઈન્ટર્ન ડોક્ટર્સની માગ મુજબ રાજ્ય સરકારે સ્ટાઈપેન્ડ પેટે એપ્રિલ, 2020થી ફેબ્રુઆરી, 2021 સુધી 10 મહિના માટે સ્ટાઈપેન્ડ ઉપરાંત 5 હજાર રૂપિયા કોરોના ડ્યુટી તરીકે આપવાનું જણાવ્યું છે. હાલ રૂપિયા 13,000ના બદલે ઈન્ટર્ન ડોક્ટર્સને 18,000 રૂપિયા ચૂકવવામાં આવશે.

નાયબ મુખ્યમંત્રી નીતિન પટેલે વધુમાં જણાવ્યું કે સમગ્ર રાજ્યની સરકારી મેડિકલ કોલેજો અને GMERS હસ્તકની કોલેજના ઇન્ટર્ન ડોક્ટર્સને રૂપિયા 5000નું વધારાનું વેતન ચૂકવાશે. સમગ્ર રાજ્યની સરકારી મેડિકલ કોલેજો અને GMERS હસ્તકની કોલેજના 2200થી વધુ ઇન્ટર્ન ડોક્ટર્સને લાભ મળશે. એપ્રિલથી લઈને ફેબૃઆરીના અંત સુધી દરેક ઈન્ટર્નને દર મહિને પાંચ હજાર રૂપિયા વધારે સ્ટાઈપેન્ડ મળશે.

અહીં નોંધનીય છે કે ગુજરાતના તમામ ઈન્ટર્ન ડૉક્ટર્સ વિવિધ માગણીઓ સાથે હડતાળ પર ઉતર્યા હતા. તેમની માગ હતી કે બીજા રાજ્યો કરતા ગુજરાતમાં સ્ટાઈપેન્ડ ઓછું ચૂકવવામાં આવે છે. પરંતુ, હવે સરકાર 20 હજાર સ્ટાઈપેન્ડ ચૂકવે તેવી માગ સાથે રાજ્યના ઈન્ટર્ન ડૉક્ટર્સ હડતાળ પર ઉતર્યા હતા.