BRTSની લેનમાં ઘૂસતા પહેલા સો વાર વિચારજો, દંડની રકમમાં થયો ધરખમ વધારો

અમદાવાદ: બીઆરટીએસ બસની નીચે આવી જતાં બે યુવાનોના મોત બાદ થયેલા હોબાળા બાદ પોલીસ અને તંત્ર બીઆરટીએસના કોરિડોરમાં ઘૂસી જતાં વાહનચાલકો વિરુદ્ધ સખ્ત થયા છે. બીઆરટીએસના રુટમાં કોઈ ઘૂસી ન જાય તે માટે હવે સુરક્ષા પણ વધારવામાં આવી છે, અને લોકો પણ કાયદો તોડવાથી દૂર રહે તે માટે દંડની રકમમાં પણ વધારો કરવામાં આવ્યો છે. હવે ટેલિગ્રામ પર મેળવો દરેક મહત્વના સમાચાર, અમારી ચેનલ સબસ્ક્રાઈબ કરવા ક્લિક કરો અગાઉ જો કોઈ વાહનચાલક બીઆરટીએસની લેનમાં ઘૂસી જાય તો તેની પાસેથી જાહેરનામાનો ભંગ કરવા બદલ કલમ 188 હેઠળ 1000 રુપિયા દંડ વસૂલવામાં આવતો હતો. જોકે, હવેથી આ ગુના હેઠળ ટુ વ્હીલર પાસેથી 1,500 રુપિયા, કાર હોય તો રુ. 3,000 અને કોમર્શિયલ વાહનો પાસેથી 5,000 રુપિયા દંડ વસૂલવામાં આવશે. એટલું જ નહીં, આવા વાહનચાલકો પર ભયજનક ડ્રાઈવિંગનો પણ કેસ કરવામાં આવશે. બીઆરટીએસની લેનમાં ડ્રાઈવિંગ કરવા બદલ દંડની રકમ વધી તેના પહેલા જ દિવસે પૂર્વ ધારાસભ્ય નિર્મલા વાધવાણીના પતિ સુનિલ વાધવાની પોલીસના હાથે ઝડપાયા હતા, અને તેમને 3,000 રુપિયા દંડ ભરવો પડ્યો હતો. નરોડા પોલીસનું વાહન પણ બીઆરટીએસની લેનમાં ઘૂસતા તેનો પણ ત્રણ હજાર રુપિયાનો મેમો ફાડવામાં આવ્યો હતો. ખમાસા ચાર રસ્તા પર બીઆરટીએસની લેનમાં ઘૂસેલા કોંગ્રેસના કોર્પોરેટર રણજીત બારડનો પણ મેમો ફાટ્યો હતો. પોલીસે તેમને પકડ્યા ત્યારે તેઓ ટ્રાફિક પોલીસ પર ગુસ્સે થઈ ગયા હતા, અને પોતાને દંડની રકમ વધારાઈ હોવાની જાણ ન હોવાનું જણાવ્યું હતું. પોલીસે જ્યારે તેમની પાસે ગાડીનો નંબર માગ્યો ત્યારે તેમણે ખોટો નંબર આપ્યો હતો. આખરે પોલીસે તેમની પાસેથી 1,000 રુપિયા દંડ વસૂલ્યો હતો.